მთავარი,სიახლეები

მდინარიდან ჯაჭვით თათებშეკრული ძაღლი ამოიყვანეს

26.06.2020 • 1542
მდინარიდან ჯაჭვით თათებშეკრული ძაღლი ამოიყვანეს

ბათუმთან ახლოს, სოფელ მახოში დღეს მდინარეში ძაღლი იპოვეს, რომელსაც თათებზე და კისერზე ჯაჭვი ჰქონდა შემოხვეული, სავარაუდოდ იმიტომ, რომ ძაღლს ვერ ეცურა.

ფეისბუქზე გავრცელებული ინფორმაციის თანახმად, ძაღლი გადაარჩინა კაცმა, რომელმაც 112-ში დარეკა. ძაღლი თავშესაფარ „აიბოლიტში” გადაიყვანეს, მოხსნეს ჯაჭვები და დროებით, გამოჯანმრთელებამდე, თავშესაფარში დარჩება.

ცხოველთა თავშესაფარ „აიბოლიტის” წარმომადგენელი, ჯემალ გოგიტიძე „ბათუმელებთან“ ამბობს, რომ მუშაობის განმავლობაში არ ახსენდება ცხოველის მიმართ გამოჩენილი მსგავსი სისასტიკე:

„ზუსტად ვერ ვიტყვი, ეს საყელურის ჯაჭვი იყო თუ სპეციალურად შეკრული, თუმცა კაცმა, რომელმაც ძაღლი მოიყვანა, თქვა, რომ ამოყვანისას ძაღლი სპეციალურად ასე შეკრულს ჰგავდა. ისე მაგრად იყო მოჭერილი, ჯაჭვი ძვლამდე იყო ჩასული“.

მან გვითხრა, რომ ძაღლს ფეხი აქვს დაზიანებული, მაგრამ მალე მორჩება და გავლას შეძლებს.

მისივე თქმით, ხშირია შემთხვევა, როცა პატრონი საკუთარ ძაღლს ქუჩაში აგდებს.  „პანდემიის პირობებში შევნიშნეთ, რომ განსაკუთრებით გაიზარდა ჯიშიანი ძაღლების, ჰასკების რაოდენობა ქუჩაში, როცა საკუთარ ძაღლს ქუჩაში აგდებ, ეს საშინელი უპასუხისმგებლობაა, არ შეიძლება ასე“ – ამბობს ჯემალ გოგიტიძე.

„ბათუმელები“ შს სამინისტროს დაუკავშირდა კითხვით, დაიწყო თუ არა აღნიშნულ ფაქტზე მოკვლევა ან გამოძიება. სამინისტროს პასუხის მიღებისთანავე ინფორმაცია განახლდება.

______________

ფოტოზე: კადრები ფეისბუქზე გავრცელებული ვიდეომასალიდან

გადაბეჭდვის წესი


ასევე: