Batumelebi | მოსამართლე ვასილ როინიშვილმა ფიცი საყვირების ფონზე დადო მოსამართლე ვასილ როინიშვილმა ფიცი საყვირების ფონზე დადო – Batumelebi
RU | GE  

მოსამართლე ვასილ როინიშვილმა ფიცი საყვირების ფონზე დადო

დღეს, 17 ივნისს, მოსამართლე ვასილ როინიშვილმა ფიცი დადო. ის საკონსტიტუციო სასამართლოს ახალი მოსამართლეა.

ფიცის დადების ცერემონიალი საყვირების ფონზე მიმდინარეობდა – ორგანიზაცია “ალტერნატივას” და პოლიტიკური მოძრაობა “ლელოს” აქტივისტები საკონსტიტუციო სასამართლოსთან შეიკრიბნენ. მათ სალომე ზურაბიშვილს ლობიო მიუტანეს.

აქციის მონაწილეები ვასილ როინიშვილის მოსამართლედ დანიშვნას აპროტესტებდნენ, რადგან ის ყოფილი იუსტიციის მინისტრის, ზურაბ ადეიშვილის გუნდის წევრია.

ფიცის დადების ცერემონიალს ესწრებიან: საქართველოს პრეზიდენტი, უზენაესი სასამართლოს თავმჯდომარე და ხელისუფლების სხვა პირები.

ვასილ როინიშვილი მოსამართლედ უზენაესმა სასამართლომ 2020 წლის 29 მაისს დანიშნა, მანამდე – 2006-2008 წლებში ვასილ როინიშვილი აჭარის პროკურორი იყო. მისი პროკურორობის პერიოდს უკავშირდება არაერთი რეზონანსული საქმე, მათ შორის, ერთ-ერთი ყველაზე სკანდალური იყო სერჟანტ როინ შავაძის წამებით მკვლელობის საქმე. აგვისტოს ომის შემდეგ ბათუმის ქუჩაში მოკლული სერჟანტის საქმე დღემდე არ არის გამოძიებული.

ვასილ როინიშვილი იყო აჭარის პროკურორი მაშინაც, როცა ბათუმის სახელმწიფო უნივერსიტეტი დაარბიეს. ეს საქმეც ამ დრომდე არ არის გამოძიებული.

საკონსტიტუციო სასამართლომ დაახლოებით ორ კვირაში ახალი თავმჯდომარეც უნდა აირჩიოს. სასამართლოს წინა თავმჯდომარეს – ზაზა თავაძეს უფლებამოსილება 15 ივნისს შეუწყდა.

ნეტგაზეთის მასალების სხვა გამოცემებში გადაბეჭდვის წესი
ავტორი