„იმ ადამიანებს შორის, რომლებსაც აქვთ ცეცხლსასროლი იარაღის შენახვის ან ტარების უფლება, რამდენია მართლმადიდებელი სასულიერო პირი და რამდენი – სხვა რელიგიური მიმდინარეობის სასულიერო პირი?“ – საჯარო ინფორმაცია შინაგან საქმეთა სამინისტროს მომსახურების სააგენტოდან გამოვითხოვეთ. ეს ის უწყებაა, რომელიც ცეცხლსასროლი იარაღის შეძენის, შენახვისა და ტარების უფლებას გასცემს.
„მომსახურების სააგენტო აღნიშნული ინფორმაციის დამუშავებას არ ახორციელებს,“ – მოგვწერეს შსს-ს მომსახურების სააგენტოდან.
ეს ინფორმაცია შს სამინისტროდან მას შემდეგ გამოვითხოვეთ, როცა 28 აპრილს პროკურატურამ ყინწვისის მონასტრის სასულიერო პირს განზრახ მკვლელობის მცდელობის და ცეცხლსასროლი იარაღის და საბრძოლო მასალის მართლსაწინააღმდეგოდ შეძენა, შენახვა, ტარების მუხლებით ბრალი წაუყენა.
მომსახურების სააგენტოდან მიღებული საჯარო ინფორმაციის მიხედვით, შენახვის უფლებით ცეცხლსასროლი იარაღი საქართველოში რეგისტრირებული აქვს 52 613 ადამიანს, ხოლო შენახვისა და ტარების უფლებით – 121 638 ადამიანს.
