Batumelebi | მოზარდი ბიჭები მხარდამჭერად უფრო ოჯახს, გოგოები კი მეგობრებს ასახელებენ – კვლევა მოზარდი ბიჭები მხარდამჭერად უფრო ოჯახს, გოგოები კი მეგობრებს ასახელებენ – კვლევა – Batumelebi

მოზარდი ბიჭები მხარდამჭერად უფრო ოჯახს, გოგოები კი მეგობრებს ასახელებენ – კვლევა

მოზარდმა ბიჭებმა დააფიქსირეს უფრო მაღალი მაჩვენებელი მშობლების მხარდაჭერისა და მათთან ურთიერთობისა, მაშინ როცა გოგონები მიიჩნევენ, რომ უფრო მნიშვნელოვან მხარდაჭერას მათ მეგობრები უწევენ – ამის შესახებ მოზარდების ჯანმრთელობასთან დაკავშირებული ქცევების შემსწავლელი გლობალური კვლევის ანგარიშში წერია, რომელიც ჯანმოს ევროპის რეგიონული ოფისის ხელშეწყობით 45 ქვეყანაში, მათ შორის, საქართველოშიც ჩატარდა. კვლევა ყოველ 4 წელიწადში ერთხელ ტარდება და მოიცავს ინფორმაციას 11, 13 და 15 წლის მოზარდების ფიზიკური ჯანმრთელობის, სოციალური ურთიერთობებისა და ფსიქიკური კეთილდღეობის შესახებ. კვლევის ფარგლებში 227 441 მოზარდი გამოიკითხა. კვლევა 2018 წლის შედეგებს ასახავს.

გარდა კონკრეტული რიცხვობრივი მაჩვენებლებისა, რომლებიც შეეხება არაჯანსაღ კვებას, არასათანადო ფიზიკურ აქტივობებს, თამბაქოს, მარიხუანისა და ალკოჰოლის მოხმარებას მოზარდებში, კვლევის ანგარიშში ნაჩვენებია, თუ როგორ განსხვავდება მოზარდების სოციალური კეთილდღეობის მაჩვენებელი სქესისა და მოზარდის ოჯახის შემოსავლების მიხედვით.

კვლევის შედეგებში ვკითხულობთ, რომ ბიჭებმა და მოზარდებმა უფრო შეძლებული ოჯახებიდან დააფიქსირეს ცხოვრებით კმაყოფილებისა და ფსიქიკური კეთილდღეობის უფრო მაღალი მაჩვენებელი, თუმცა „ასაკის მატებასთან ერთად ფსიქიკური კეთილდღეობის მაჩვენებელი მცირდება: მაღალი ასაკის მოზარდები ნაკლებად არიან კმაყოფილები ცხოვრებით და ჯანმრთელობასთან დაკავშირებული ჩივილებიც მეტად აწუხებთ”.

ამავდროულად კვლევის ანგარიშში წერია, რომ პრაქტიკულად ყველა ქვეყანაში, 15 წლის ასაკის გოგონები აფიქსირებენ ფსიქიკური კეთილდღეობის უფრო დაბალ მაჩვენებელს, ვიდრე ბიჭები. 2014 წლის კვლევის შემდეგ, ჯანმრთელობასთან დაკავშირებული სხვადასხვა ჩივილები გაზრდილია. ყველაზე ხშირად ჩივილები ეხებოდა ნევროზს, გაღიზიანებას და ძილთან დაკავშირებულ პრობლემებს” – წერია კვლევაში.

ყოველი სამი მოზარდიდან ორი მშობლებს თავის ძლიერ მხარდამჭერად მიიჩნევს და ასახელებს, რომ მათთან საუბარი მარტივია, მაგრამ მშობლებისა და შვილების ურთიერთობის ეს ორივე პოზიტიური ასპექტი, ასაკის მატებასთან ერთად ქვეითდება.

ბიჭები აფიქსირებენ მშობლების მხარდაჭერისა და მათთან კომუნიკაციის მაღალ მაჩვენებელს, მაშინ როცა გოგონები უფრო მეტ თანაგრძნობას გრძნობენ მათი მეგობრებისგან. “მთლიანობაში, გოგონები უფრო ხშირად აფიქსირებდნენ თანატოლების მხრიდან მხარდაჭერას. გენდერული სხვაობა სტაბილური რჩება ასაკის მატებასთან ერთად” – აღნიშნულია კვლევაში.

 

გამოკითხული მოზრდებიდან ბიჭები უფრო ხშირად აღნიშნავენ, რომ ოჯახის მხარდაჭერა აქვთ (73% – ბიჭების, 70% – გოგოების), მაშინ როცა გოგონები აღნიშნავენ, რომ ისინი ძალიან დიდ მხარდაჭერას იღებენ მეგობრებისგან (54% – ბიჭები, 65% – გოგონები)

კვლევის ანგარიშში ჩანს, რომ სოციალური კეთილდღეობა  სქესის გარდა, განსხვავდება სოციალური ფენის მიხედვითაც. მოზარდები უფრო მდიდარი ოჯახებიდან აფიქსირებენ მშობლებთან უკეთეს კომუნიკაციას და ოჯახისა თუ თანატოლების მხრიდან მხარდაჭერის ასევე მაღალ მაჩვენებელს. “მოზარდები უფრო მაღალი შემოსავლების მქონე ოჯახებიდან, მიიჩნევდნენ, რომ მათ უფრო უმარტივდებათ მშობლებთან იმ საკითხების განხილვა, რაც მათ აწუხებთ” – ვკითხულობთ კვლევაში.

სოციალური უთანასწორობა თანატოლთა მხარდაჭერის მაჩვენებელში (ორივე სქესისთვის), დაფიქსირდა საკვლევი ქვეყნების ნახევარზე მეტში. მოზარდები მდიდარი ოჯახებიდან უფრო ხშირად აფიქსირებდნენ თანატოლებისგან მხარდაჭერას – 64%, ვიდრე მოზარდები ნაკლებად შეძლებული ოჯახებიდან – 56%.

კვლევა: მხარდაჭერას ოჯახისა და ნათესავების მხრიდან პრინციპული მნიშვნელობა აქვს მოზარდების განვითარების, სოციალიზაციის, ჯანმრთელობისა და კეთილდღეობისთვის.  ოჯახის მხრიდან მხარდაჭერის მაღალი მაჩვენებელი უკავშირდება ფსიქიკური ჯანმრთელობის უფრო კარგ მაჩვენებლებს და სარისკო ქცევის დაბალ მაჩვენებელთან მოზარდებში.

კვლევის მნიშვნელოვანი მიგნებებია:

  • როგორც წესი, მოზარდებისთვის დედასთან ურთიერთობა უფრო ადვილია, ვიდრე მამასთან.
  • 15 წლის გოგონების მხოლოდ 57% -ს შეუძლია მამასთან მარტივად ისაუბროს მამასთან იმ საკითხების შესახებ, რომლებიც მათ აწუხებს.
  • ოჯახის მხარდაჭერისა და მშობლებთან კარგი კომუნიკაციის მაჩვენებელი ასაკთან ერთად ქვეითდება.
  • ბიჭების ნახევარზე მეტი და გოგონათა დაახლოებით ორი მესამედი მნიშვნელოვან მხარდამჭერად ასახელებს თანატოლებს.
  • 2014 წლის კვლევის შემდეგ, მოზარდების რაოდენობა, რომლებიც მნიშვნელოვან მხარდაჭერას იღებდნენ თანატოლებისგან, შემცირდა ( 63% -დან 60%-მდე).
  • სოციალური კეთილდღეობის ხარისხი, როგორც წესი, უფრო მაღალია მაღალი შემოსავლის მქონე ბიჭების და გოგონების ჯგუფში.
ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან