გამოცდების ეროვნული ცენტრის ინფორმაციით, დღეს, 4 მაისს, აბიტურიენტებისთვის ახალი პროექტი „ვებსკოლა“ უნდა დაიწყოს.
ცენტრის ინფორმაციით, პროექტის ფარგლებში, პრაქტიკოსი მასწავლებლები აბიტურიენტებისთვის ჩაატარებენ ვებინარებს, რომლებიც პლატფორმა el.ge-ზე აიტვირთება.
„ვებინარების განრიგი ყოველკვირეულად განახლდება და ეტაპობრივად ყველა საგანს მოიცავს. ახალი პროექტი აბიტურიენტებისთვის 4 ივლისის ჩათვლით გაგრძელდება.
ვებინარებზე დარეგისტრირება ნებისმიერ მსურველს შეეძლება. მნიშვნელოვანია, რომ თითოეული ვებინარის აუდიოჩანაწერი შეინახება და ნებისმიერი მსურველისთვის ხელმისაწვდომი იქნება“, – ნათქვამია გამოცდების ეროვნული ცენტრის განცხადებაში.
ცენტრის ინფორმაციით, მოსწავლეებს საშუალება ექნებათ, ღიად დააფიქსირონ საკუთარი მოსაზრებები, შეკითხვები, სურვილები და შენიშვნები, რაც განიხილება და გათვალისწინებული იქნება შემდგომი ვებინარების დაგეგმვისას.