Batumelebi | გადაიდო თუ არა გეგმიურ ოპერაციებთან ერთად აბორტები – განმარტება გადაიდო თუ არა გეგმიურ ოპერაციებთან ერთად აბორტები – განმარტება – Batumelebi
RU | GE  

გადაიდო თუ არა გეგმიურ ოპერაციებთან ერთად აბორტები – განმარტება

ქვეყანაში COVID19-ის პრევენციის ფარგლებში გატარებული ღონისძიებების გამო გეგმიური ოპერაციები 4 თვით გადაიდო. განცხადება ამის შესახებ საქართველოს ჯანდაცვის მინისტრმა ეკატერინე ტიკარაძემ  24 მარტს გააკეთა.

ტიკარაძემ განმარტა, რომ ცვლილება ეხება მხოლოდ გეგმიურ ოპერაციებს და  არ შეეხება გადაუდებელ ოპერაციებს. თუმცა საზოგადოებისთვის გაუგებარი დარჩა, შედის თუ არა, მაგალითად, აბორტი გეგმიური ოპერაციების ჩამონათვალში.

ჯანმრთელობის ცენტრ “მედინას” კლინიკური დირექტორი, მეან-გინეკოლოგი ჯუმბერ უნგიაძე განმარტავს, რომ აბორტი არ მიიჩნევა გეგმიურ ოპერაციად და შესაბამისად,  COVID19-ის პრევენციის გამო გადადებული გეგმიური პროცედურების ჩამონათვალში არ შედის.

ჯუმბერ უნგიაძე ამბობს, რომ აბორტის თავიდან ასაცილებლად გარდა კალენდარული მეთოდისა, არსებობს სხვადასხვა სახის კონტრაცეპციის მეთოდი, მათ შორის, ბარიერული, მექანიკური, ორალური (აბი)…, ასევე, პოსტკოიტალური ანუ ჩასახვის შემდგომ 72 საათის განმავლობაში მისაღები პრეპარატი.

აბორტი არის სამედიცინო ჩარევა, რომელიც ტარდება ორსულობის შეწყვეტის მიზნით. კანონმდებლობით, აბორტის ჩატარება შესაძლებელია 12 კვირამდე ვადის ორსულობისას.
12 კვირაზე მეტი ვადის ორსულობის დროს აბორტი ნებადართულია მხოლოდ სამედიცინო და სოციალური ჩვენებების შემთხვევაში, რომელიც განიხილება ინდივიდუალურად, კომისიური წესით.

აბორტის შესახებ საქართველოს ჯანდაცვის სამინისტროს მიერ მომზადებული პაციენტის გზამკვლევი იხილეთ აქ, კონტრაცეპციის მეთოდებზე – აქ.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან