ბათუმის რამდენიმე ქუჩას, დეზინფექცია პირველად 20 მარტს ჩაუტარდა. შემდეგ კი ქუჩების დეზინფექცია შეჩერდა. როგორც „სანდასუფთავების“ ხელმძღვანელი დავით დუმბაძე „ბათუმელებთან“ ამბობს, ქუჩების დეზინფექცია გაგრძელდება, ოღონდ მხოლოდ იმ ქუჩებზე, სადაც ხალხმრავლობაა.
„პრიორიტეტს ვანიჭებთ ხალხმრავალ ქუჩებს. ის ტროტუარები უნდა დამუშავდეს, სადაც სუპერმარკეტები და აფთიაქებია და ხალხის მოძრაობა მეტია. იქ, სადაც დღის განმავლობაში 5 კაცი არ გაივლის, იმ ქუჩების დეზინფექციას აზრი არ აქვს. შევხვდებით ვიცე-მერს და გავივლით ამ საკითხს, პირველ რიგში რომელი ქუჩების დეზინფექცია ჩატარდება.
ჭაობის დასახლების გარდა, დეზინფექცია გავაკეთეთ ყველგან, რადგან გაწვიმდა. ახლა გამოვიდა ამინდი და ვაპირებთ სხვა ქუჩების დეზინფექციას“, – ამბობს დავით დუმბაძე.
რაც შეეხება თანხებს, მისი თქმით, ქუჩების დეზინფექციის დაფინანსება ბიუჯეტში არ იყო გათვალისწინებული, ამიტომ იმის მიხედვით მოიძიებენ ბიუჯეტს, რამდენის საჭიროებაც გაჩნდება.
მერიის ინფორმაციით, სანდასუფთავების თანამშრომლები ზეგანაკვეთური შრომის მიუხედავად, საგანგებო მდგომარეობის პერიოდში, პრემიებს არ აიღებენ, რადგან ოფიციალური განცხადებით, მერიის და მისი ორგანიზაციების თანამშრომელთა ხელფასების 1/3-ი კორონავირუსთან ბრძოლის ფონდში გადაირიცხება.
მთავარი ფოტო: ბათუმის ქუჩების დეზინფექცია/მერია
