საქართველოს ელჩი თურქეთში, გიორგი ჯანჯღავა ფეისბუქზე წერს, რომ საელჩო ყველაფერს აკეთებს თურქეთის რესპუბლიკაში მყოფი ქართველების დასახმარებლად. საქმე ეხება გუშინ, 29 მარტს მომხდარ ფაქტს, როდესაც ავტობუსი, რომლითაც საქართველოს 54 მოქალაქე საქართველოში ბრუნდებოდა, თურქმა სამართალდამცავებმა უკან, სტამბოლში დააბრუნეს. მოქალაქეები აჭარის ტელევიზიას უყვებიან, რომ მათ წუხელ ღია ცის ქვეშ გაათიეს ღამე.
„გუშინ სტამბოლიდან საქართველოს მიმართულებით მოძრავი ავტობუსი, რომელშიც საქართველოს მოქალაქეები იმყოფებოდნენ, თურქი სამართალდამცავების გადაწყვეტილებით, უკან დააბრუნეს, რადგან ავტობუსის მფლობელ კომპანიასა და მგზავრებს არ გააჩნდათ კორონავირუსის გავრცელების პრევენციის ფარგლებში შემოღებული მგზავრობის ნებართვა. სტამბოლში საქართველოს გენერალური საკონსულო მუშაობს ამ საკითხის გადაწყვეტაზე,“ – წერს ელჩი.
„ბათუმელები“ დაუკავშირდა გიორგი ჯანჯღავას დამატებით კომენტარისთვის. ელჩის განმარტებით, სტამბოლში მდებარე საქართველოს საკონსულო ჩართულია საკითხის მოგვარებაში.
ელჩის თქმით, გამომდინარე იქიდან, რომ თურქეთში გადაადგილებასთან დაკავშირებით მოქმედებს მთელი რიგი შეზღუდვები, საქართველოს მოქალაქეები ვალდებულები არიან, ჰქონდეთ კორონავირუსის გავრცელების პრევენციის ფარგლებში შემოღებული სპეციალური სამგზავრო ნებართვა. მსგავს ნებართვებს ყველა ქალაქში ადგილობრივი გუბერნატორის სამსახური (valilik) გასცემს.
ელჩის თქმით, 29 მარტს კიდევ ორი მსგავსი ფაქტი მოხდა, თუმცა ის არ გახმაურებულა.
საქმე ეხება კიდევ ორ ავტობუსს, რომლებიც სტამბოლიდან საქართველოს მიმართულებით გამოემგზავრნენ.
„აღნიშნული ავტობუსებიც გაჩერებულ იქნა თურქი სამართალდამცავების მიერ, მიუხედავად იმისა, რომ მათ გააჩნდათ ზემოაღნიშნული ნებართვა. ამ შემთხვევაში, ანკარაში საქართველოს საელჩოს ჩართულობითა და სტამბოლსა და ტრაპიზონში საქართველოს გენერალური საკონსულოების ოპერატიული მოქმედების საფუძველზე, აღნიშნულ ავტობუსებს მიეცათ საქართველოში გამგზავრების საშუალება,“ – წერს გიორგი ჯანჯღავა.
ელჩის თქმით, თურქეთის რესპუბლიკაში არსებული საქართველოს სამივე მისია მუშაობს 24-საათიან რეჟიმში. მოქალაქეებმა, თურქეთის ნებისმიერი ქალაქიდან გამომგზავრებამდე, უნდა დარეკონ ცხელ ხაზზე და დააზუსტონ მგზავრობის დეტალები.
საქართველოს საელჩო თურქეთში მოუწოდებს მოქალაქეებს, დამატებითი კითხვების შემთხვევაში დაუკავშირდნენ ცხელ ხაზს:
- ანკარაში საქართველოს საელჩოს ცხელი ხაზი: +90 533 690 30 40; +905392208280
- სტამბოლში საქართველოს გენერალური საკონსულოს ცხელი ხაზი: +90 541 818 44 00
- ტრაპიზონში საქართველოს გენერალური საკონსულოს ცხელი ხაზი: +90 541 326 22 26
