მსოფლიო ბანკის დაფინანსებით დაიწყო ახალი პროექტი – „ინოვაცია, ინკლუზიური განათლება და ხარისხი“. ამ შესახებ განათლების სამინისტრო იტყობინება და მოკლე რელიზის სახით ავრცელებს ინფორმაციას, თუ რაში უნდა დაიხარჯოს 102 მილიონი დოლარი.
სამხრეთ კავკასიაში მსოფლიო ბანკის რეგიონული დირექტორი, სებასტიან მოლინეუსი, რომელიც განათლების მინისტრს შეხვდა, ამბობს, რომ პროექტის მიზანია გააუმჯობესოს განათლების ხარისხი და გაზარდოს პედაგოგთა კვალიფიკაცია. ასევე, პროექტი ითვალისწინებს საგანმანათლებლო დაწესებულებების ინფრასტრუქტურის გაუმჯობესებას და ტექნიკურ აღჭურვას.
„ჩვენ განვაახლებთ 60 სკოლას თანამედროვე სტანდარტების მიხედვით. აგრეთვე, ავაშენებთ ახალ სკოლებსაც. პროექტის ფარგლებში ყურადღება მიექცევა სწავლების პროცესში თანამედროვე ტექნოლოგიების გამოყენებას“, – ამბობს სებასტიან მოლინეუსი მინისტრთან შეხვედრისას.
პრესრელიზის სახით გავრცელებულ ინფორმაციაში ასევე ვკითხულობთ, რომ პროექტს ხუთი ძირითადი მიზანი აქვს, მათ შორის სკოლამდელი განათლების ხელშეწყობა და მასზე ხელმისაწვდომობის გაზრდა; სწავლების ხარისხის გაუმჯობესება; უმაღლესი განათლების დაფინანსების მოდელის გაუმჯობესება და მისი საერთაშორისო სტანდარტებთან დაახლოება; სისტემის გაძლიერება და დაინტერესებულ მხარეებს შორის კომუნიკაციის გაუმჯობესება; პროექტების მენეჯმენტის, მონიტორინგისა და შეფასების სისტემის გაუმჯობესება.
102 მილიონი დოლარი მომდევნო ექვსი წლის განმავლობაში უნდა დაიხარჯოს და სწორედ ამ პერიოდში უნდა აშენდეს 5 ახალი სკოლა და გარემონტდეს 60 არსებული, თუმცა განათლების სამინისტრო „ბათუმელებთან“ ამ ეტაპზე ვერ აკონკრეტებს, რომელ რეგიონში აშენდება ახალი სკოლები მსოფლიო ბანკის დაფინანსებით და რომელია ის სკოლები, სადაც რეაბილიტაცია ჩაუტარდება.
„ამ კრიტერიუმებს ერთად განსაზღვრავს სამინისტრო და მსოფლიო ბანკი, დასხდებიან ექსპერტები და ერთად იმსჯელებენ, რომელ რეგიონში რა უნდა იყოს“, – გვითხრეს სამინისტროს პრესსამსახურში.
