ბავშვისთვის საფრთხის შემცველი ინფორმაციის ინტერნეტში განთავსების მოწესრიგების შესახებ დებულება საქართველოს კომუნიკაციების ეროვნულმა კომისიამ რამდენიმე დღის წინ დაამტკიცა.
„ბავშვებისთვის ონლაინსაფრთხეების შეფასებასა და შემცირებაში უპირატესი როლი აკისრია მშობელს. ამ დებულებით განსაზღვრული რეგულაცია მიმართულია მშობლის მიერ ბავშვებისთვის ონლაინსაფრთხეების თავიდან აცილების ხელშეწყობაზე“, – აღნიშნულია კომისიის დადგენილებაში.
დებულება, რომლითაც განისაზღვრება ბავშვისთვის საფრთხის შემცველი ინფორმაციის ინტერნეტში განთავსების წესები, 2020 წლის პირველი ივნისიდან შევა ძალაში. განისაზღვრა ასევე ინტერნეტში ინფორმაციის განმთავსებლების და ინტერნეტმომსახურების მიმწოდებლების ვალდებულებებიც.
[checklist]
- დებულების მოქმედება ვრცელდება ყველა ფიზიკურ და იურიდიულ პირზე, რომელიც მომხმარებელს აწვდის ინტერნეტმომსახურებას ან საკუთარი ინტერნეტგვერდის საშუალებით ინტერნეტში განათავსებს ინფორმაციას, კერძოდ, აუდიოვიზუალურ პროდუქციას [პროგრამები, თამაშები, ფილმები, მათ შორის, ანიმაციური ფილმები და სერიალები], თუ ასეთი ინფორმაცია ხელმისაწვდომია საქართველოს ტერიტორიაზე.
[/checklist]
[crosslist]
- დებულებით არ რეგულირდება ბავშვების მიერ ინტერნეტის ჭარბი მოხმარების, ინტერნეტში ბავშვის ფსიქოლოგიური ჩაგვრის, შევიწროების, დევნის [მათ შორის, დამცირება, დაშინება, ცილისწამება, შანტაჟი], ბავშვის პერსონალური მონაცემების უსაფრთხოების და ინტერნეტქსელში უცხო პირებთან კომუნიკაციის საფრთხეებისგან ბავშვის დაცვის საკითხები.
- ამ დებულების მოქმედება არ ვრცელდება სპეციალურ პროგრამულ უზრუნველყოფაზე [აპლიკაცია], ასევე ინტერნეტში ვიდეოგაზიარების პლატფორმაზე მომხმარებლების მიერ განთავსებულ აუდიოვიზუალურ პროდუქციაზე, რომელზეც ვიდეო-გაზიარების პლატფორმის მფლობელს არ გააჩნია სარედაქციო პასუხისმგებლობა.
[/crosslist]
დებულებაში აღნიშნულია, რომ „იმ შემთხვევაში, თუ კომისიისთვის ცნობილი გახდება ინტერნეტში ისეთი ინფორმაციის განთავსების თაობაზე, რომელიც იწვევს საქართველოს სისხლის სამართლის კოდექსით გათვალისწინებული პასუხისმგებლობის დაკისრებას, კომისია შესაბამისი რეაგირების მიზნით მიმართავს სამართალდამცავ ორგანოებს“.
საფრთხის შემცველი ინფორმაციის გავლენისგან ბავშვის დაცვა [დებულებიდან]:
„ბავშვისთვის საფრთხის შემცველი ინფორმაციის გავლენისგან ბავშვის დაცვის მიზნით, ინტერნეტში ინფორმაციის განმთავსებელი ვალდებულია მიანიჭოს ინფორმაციას შესაბამისი ასაკობრივი ნიშანდება.
შემდეგი სპეციალური შემზღუდავი ნიშანი უნდა გამოისახოს ინტერნეტსივრცეში განთავსებულ ინფორმაციაზე:
„18“ წრეში – როდესაც ინფორმაცია შეუფერებელია 18 წლამდე არასრულწლოვნებისთვის;
„15“ წრეში – როდესაც ინფორმაცია შეუფერებელია 15 წლის არასრულწლოვნებისთვის;
„12“ წრეში – როდესაც ინფორმაცია შეუფერებელია 12 წლამდე არასრულწლოვნებისთვის;
„7“ წრეში – როდესაც ინფორმაცია შეუფერებელია 7 წლამდე არასრულწლოვნებისთვის.
ინტერნეტგვერდებზე, რომელთა სამიზნე აუდიტორიას წარმოადგენენ მხოლოდ ბავშვები (მათ შორის, საგანმანათლებლო ინტერნეტგვერდები, საგანმანათლებლო დაწესებულებების საინფორმაციო გვერდები, ინტერნეტგვერდები, სადაც განთავსებულია საბავშვო ფილმები და თამაშები) აკრძალულია ბავშვებისთვის საფრთხის შემცველი ინფორმაციის ნებისმიერი ფორმით განთავსება.
18 წლამდე არასრულწლოვნებისთვის შეუფერებელი ინფორმაციის შემცველ ინტერნეტგვერდზე დაშვება უნდა მოხდეს ფიზიკური პირის რეგისტრაციით.
ინტერნეტში ბავშვისთვის საფრთხის შემცველი ინფორმაციის განთავსების წესების დარღვევისთვის ადმინისტრაციული სახდელი სამართალდამრღვევს ეკისრება საქართველოს ადმინისტრაციულ სამართალდარღვევათა კოდექსის შესაბამისად“.
[ამ კოდექსით, ინტერნეტში ბავშვისათვის საფრთხის შემცველი ინფორმაციის განთავსებისა და ზოგადსაგანმანათლებლო დაწესებულებაში, ბიბლიოთეკასა და ბავშვთა სპეციალიზებულ დაწესებულებაში ბავშვისათვის ინტერნეტქსელის ხელმისაწვდომობის წესების დარღვევა ან შესაბამისი კონტროლის განხორციელების უფლებამოსილების მქონე ორგანოს გადაწყვეტილების შეუსრულებლობა გამოიწვევს დაჯარიმებას 1000 ლარის ოდენობით. იგივე ქმედება, ჩადენილი განმეორებით, გამოიწვევს დაჯარიმებას 3000 ლარის ოდენობით – კოდექსის ეს მუხლიც 2020 წლის 1-ლი ივნისიდან ამოქმედდება].
ინტერნეტმომსახურების მიმწოდებლები ვალდებული არიან, 2020 წლის პირველ ივნისამდე, კომუნიკაციების ეროვნულ კომისიას მიაწოდონ ინფორმაცია „ბავშვთა უფლებების კოდექსით“ და ამ დებულებით გათვალისწინებული ვალდებულების შესრულების უზრუნველყოფის მიზნით, მათ მიერ განხორციელებული ღონისძიებების თაობაზე.
ბავშვთა უფლებების კოდექსითა და ამ დებულებით კი, „ინტერნეტმიმწოდებელი [ინტერნეტპროვაიდერი] ვალდებულია შეიმუშაოს ისეთი მექანიზმები, რომლებიც მას შესაძლებლობას მისცემს, მომხმარებლის მოთხოვნით დაბლოკოს ბავშვისთვის საფრთხის შემცველი ინფორმაციის ბავშვისთვის ხელმისაწვდომობა“.
ამ თემაზე:
https://netgazeti.ge/news/278984/
