Batumelebi | ბათუმში ყველაზე მეტი ბინა გაიყიდა თბილისის შემდეგ ბათუმში ყველაზე მეტი ბინა გაიყიდა თბილისის შემდეგ – Batumelebi

ბათუმში ყველაზე მეტი ბინა გაიყიდა თბილისის შემდეგ

აჭარა მეორე ადგილზეა თბილისის შემდეგ, სადაც ყველაზე მეტი უძრავი ქონება გაიყიდა. ISET-ის უძრავი ქონების ბაზრის მიმოხილვის მიხედვით, მესამე ადგილზე ამ მხრივ კახეთის რეგიონია. ამავე მიმოხილვის მიხედვით, ქვეყნის მასშტაბით უძრავი ქონების გაყიდვების ნახევარზე მეტი დაფიქსირდა თბილისსა და ბათუმში.

უძრავი ქონების ბაზარზე, მთლიან წილში, 40,7%-ით თბილისი დომინირებდა, აჭარისა და კახეთის წილი კი, მთლიან გაყიდვებში იყო, შესაბამისად, 12,4 და 12,2 პროცენტი. ამასთან, 2019 წლის ბოლოს, მესამე კვარტალთან შედარებით, საქართველოში უძრავი ქონების ბაზარი გაიზარდა 4.7 პროცენტით. 2018 წლის ანალოგიურ პერიოდთან შედარებით კი, 2019 წელს [მეოთხე კვარტალში], უძრავი ქონების ბაზარზე წლიური 3%-იანი ზრდა დაფიქსირდა – აღნიშნულია მიმოხილვაში.

ISET-ის უძრავი ქონების ბაზრის მიმოხილვის მიხედვით, აჭარაში 2019 წელს 4 288 ერთეული უძრავი ქონება გაიყიდა. აქედან უმეტესობა ბათუმში -3 836 ერთეული.

თბილისში შარშან 14 084 ერთეული უძრავი ქონება გაიყიდა; გორის, გურჯაანისა და თელავის მუნიციპალიტეტებში კი, შესაბამისად – 973, 868 და 828 ერთეული.

უშუალოდ თბილისში ყველაზე მეტი ქონება გაიყიდა – საბურთალოში [3 591], ვაკესა [2 375] და გლდანში [1 609 ერთეული].

სტატისტიკის ეროვნული სამსახურის მონაცემებით, 2019 წელს, ქვეყნის მასშტაბით, მშენებლობის ყველაზე მეტი ნებართვა თბილისის შემდეგ აჭარაში გაიცა.

აჭარა პირველ ადგილზეა ქვეყნის მასშტაბით, სადაც 2019 წელს, გაცემული ნებართვების მიხედვით, ყველაზე მეტი ფართობი აშენდა.

ამ თემაზე:

მშენებლობის ყველაზე მეტი ნებართვა თბილისის შემდეგ აჭარაში გაიცა – 2019 წელი

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com