იმისათვის, რომ სტატუსი აიმაღლონ, პედაგოგები საგნობრივ კომპეტენციას წელიწადში ორჯერ – ზაფხულისა და შემოდგომის გამოცდებზე ადასტურებენ. 6-ათასამდე პრაქტიკოსმა პედაგოგმა ამ დრომდე ვერ შეძლო საგნობრივი კომპეტენციის დადასტურება. ზოგიერთ მათგანს 1-2 ან 3 ქულა დააკლდა იმისთვის, რომ უფროსი მასწავლებელი გამხდარიყო 2019 წელს. მასწავლებლების ნაწილს გაუჩნდა მოლოდინი, რომ გამოცდებზე მიკლებულ ქულებს სხვა აქტივობებით შეივსებდნენ, თუმცა ეს ასე არ არის.
შეუძლიათ თუ არა პედაგოგებს სხვა აქტივობებით დააგროვონ 1-2 ან 3 ქულა იმისთვის, რომ უფროსი მასწავლებლის სტატუსი მიიღონ? თუ აუცილებელია გამოცდა კვლავ ჩააბარონ? – „ბათუმელები“ ამ საკითხზე მასწავლებელთა პროფესიული განვითარების ეროვნული ცენტრის მასწავლებლის პროფესიის რეგულირების პროგრამის ხელმძღვანელს, ხათუნა ბარაბაძეს ესაუბრა.
ხათუნა ბარაბაძე ამბობს, რომ პედაგოგმა თუკი ვერ დაადასტურა კომპეტენცია საგნობრივ გამოცდაზე და არც პროფესიული უნარები აქვს დადასტურებული, ის სხვა აქტივობებით ვერ შეძლებს შეივსოს ქულები და ამ ფორმით გახდეს უფროსი მასწავლებელი.
„გამოცდაზე გასვლა აუცილებელი და სავალდებულოა. პედაგოგს ორივე გამოცდა – პროფესიული უნარები და საგნობრივი კომპეტენცია მინიმუმ 1 კრედიტზე უნდა ჰქონდეს ჩაბარებული, სხვა შემთხვევაში, კრედიტების შევსებით ვერ აიმაღლებს სტატუსს.
თუკი პედაგოგმა საგნობრივ გამოცდაზე დააგროვა მინიმუმ 1 კრედიტქულა (ამისთვის 30 პროცენტზე მეტი უნდა დააგროვოს ორივე გამოცდაზე), მაგრამ მაინც ვერ მოახერხა სტატუსის შესაცვლელად, საჭირო 19 კრედიტქულის დაგროვება, მხოლოდ ამ შემთხვევაში შეუძლია პედაგოგს სხვა აქტივობებით შეივსოს კრედიტები.
ამისთვის ჩვენ პედაგოგებს ვთავაზობთ 5-კრედიტიან ტრენინგებს, რომელზე რეგისტრაციაც 15-დან 20 თებერვლამდე გამოცხადდება. „ტრენინგების წარმატებით გავლის შემთხვევაში პედაგოგს შეუძლია 5 კრედიტი მოიპოვოს“, – ამბობს ბარაბაძე.
ცენტრის ინფორმაციით, ამ დროისთვის დაახლოებით 13 ათასი პრაქტიკოსი მასწავლებელი მუშაობს საჯარო სკოლებში. აქედან ვისაც არც ერთი გამოცდა არ აქვს ჩაბარებული, ასეთი პედაგოგი დაახლოებით 6 000-ია, ხოლო იმ პედაგოგების რაოდენობა, რომლებსაც მხოლოდ ერთი საგნობრივი კომპეტენცია (პროფესიული უნარები) აქვთ დადასტურებული, დაახლოებით 2 200-ია, ხოლო 2 ათასამდე პედაგოგს ორივე გამოცდა აქვს ჩაბარებული, მაგრამ რამდენიმე კრედიტი აკლია სტატუსის შესაცვლელად.
მასწავლებლის პროფესიული განვითარების ახალი სქემა, 2020 წლის სექტემბრიდან ამოქმედდება, მანამდე კი, პედაგოგებს სტატუსის შესაცვლელად არსებული სქემით – გამოცდების ჩაბარებით მოუწევთ კომპეტენციის დადასტურება როგორც პროფესიულ უნარებში, ასევე იმ საგნებში, რასაც სკოლაში ასწავლიან.
მთავარი ფოტო: „ბათუმელების“ არქივი
ამავე თემაზე:
https://batumelebi.netgazeti.ge/news/205566/
