Batumelebi | „გიგანტური ვირთხა“ წავი აღმოჩნდა – საგანგებომ ცხოველი ქობულეთიდან ტყეში გადაიყვანა „გიგანტური ვირთხა“ წავი აღმოჩნდა – საგანგებომ ცხოველი ქობულეთიდან ტყეში გადაიყვანა – Batumelebi
RU | GE  

„გიგანტური ვირთხა“ წავი აღმოჩნდა – საგანგებომ ცხოველი ქობულეთიდან ტყეში გადაიყვანა

ქობულეთში, თამარ მეფის გამზირზე მდებარე საცხოვრებელ სახლში მოქალაქეებმა „გიგანტური ვირთხა“ იპოვეს და დახმარებისთვის პოლიციას დაუკავშირდნენ.

ადგილზე პოლიციაც მივიდა და საგანგებო სიტუაციების მართვის სამსახურიც, თუმცა აღმოჩნდა, რომ ცხოველი არა „გიგანტური ვირთხა“, არამედ მოზრდილი წავი იყო, რომელიც წითელ ნუსხაშია შეტანილი.

წავი შემთხვევის ადგილიდან პიკაპით გადაიყვანეს და როგორც საგანგებო სიტუაციების მართვის სამსახურში გვითხრეს, ტყეში გაუშვეს.

„გიგანტური ვირთხის“ გადაყვანის ოპერაცია. კადრი ვიდეოდან

შემთხვევა 31 ოქტომბერს მოხდა, ადგილიდან წავის გადაყვანის კადრები კი ფეისბუქგვერდმა „ლეღვამ“ გაავრცელა.

წავები  ქობულეთის დაცულ ტერიტორიებზე ბინადრობენ და  იშვიათ და გადაშენების პირას მყოფი ცხოველების სახეობას მიეკუთვნებიან.

_____________

მთავარ ფოტოზე: წავი Lutra lutra. დაცული ტერიტორიების სააგენტოს ინფორმაციით, წავის სწორედ ეს სახეობა ბინადრობს ქობულეთის დაცულ ტერიტორიებზე.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com