Batumelebi | შსს: ცემის შედეგად გარდაცვლილი მასწავლებლის საქმეზე ერთი პირი დაკავებულია შსს: ცემის შედეგად გარდაცვლილი მასწავლებლის საქმეზე ერთი პირი დაკავებულია – Batumelebi
RU | GE  

შსს: ცემის შედეგად გარდაცვლილი მასწავლებლის საქმეზე ერთი პირი დაკავებულია

შინაგან საქმეთა სამინისტროს ინფორმაციით, ბრალდებული, რომელმაც ბათუმში პედაგოგი სცემა პოლიციელებმა 29 ნოემბერს დააკავეს.

ბრალდებული საკუთარი ნებით გამოცხადდა პოლიციაში თუ მიმალვაში მყოფი იპოვეს? – “ბათუმელების” ამ კითხვას შინაგან საქმეთა სამინისტროში არ უპასუხეს.

ბათუმში, რურუას ქუჩაზე, 44 წლის მამაკაცი ქუჩაში კომატოზურ მდგომარეობაში ნახეს და საავადმყოფოში გადაიყვანეს. მამაკაცი საავადმყოფოში მიყვანის შემდეგ, რამდენიმე დღეში გარდაიცვალა. “ბათუმელების” ინფორმაციით, ის ნაცემი იყო. მამაკაცი ხულოს მუნიციპალიტეტის სოფელ ბოძაურში, სკოლის მასწავლებლად მუშაობდა და ბათუმში სტუმრად იმყოფებოდა. ინციდენტი ერთ-ერთ საბანკეტო დარბაზთან ახლოს მოხდა.

შინაგან საქმეთა სამინისტროს ინფორმაციით, ამ დროისთვის მიმდინარეობს საგამოძიებო და სამძებრო ღონისძიებები. გამოძიება სისხლის სამართლის კოდექსის 117-ე მუხლის მე-5 ნაწილით დაიწყო, რაც ჯანმრთელობის განზრახ მძიმე დაზიანებას ნიშნავს, – ისჯება თავისუფლების აღკვეთით, ვადით რვიდან თერთმეტ წლამდე.

ნეტგაზეთის მასალების სხვა გამოცემებში გადაბეჭდვის წესი
"ბათუმელები"