მთავარი,სიახლეები

უმაღლესი საბჭოს ყოფილი დეპუტატი ფიზიკური ძალადობისთვის დააჯარიმეს

17.10.2019 • 2228
უმაღლესი საბჭოს ყოფილი დეპუტატი ფიზიკური ძალადობისთვის დააჯარიმეს

უმაღლესი საბჭოს ყოფილი დეპუტატი კახა მიქელაძე 2500 ლარით დააჯარიმეს ფიზიკური ძალადობისთვის. მოსამართლე დავით მამისეიშვილმა ჯარიმის გადახდა კახა მიქელაძის თანმხლებ პირს – ირაკლი აბუსერიძესაც დააკისრა – 3500 ლარის ოდენობით.

საუბარია ბათუმში 21 ივნისს მომხდარ შემთხვევაზე. სიტყვიერი კონფლიქტი სოციალურ ქსელ „ფეისბუქში“ დაიწყო, სადაც ბათუმის მერიის ყოფილმა თანამშრომელმა ალექსანდრე თევზაძემ 20 ივნისის მოვლენებთან დაკავშირებით უმაღლესი საბჭოს ყოფილ დეპუტატს საჯაროდ კომენტარი დაუწერა. მეორე დღეს ალექსანდრე თევზაძე მსჯავრდებულებმა ევროპის მოედანზე გამართული საპროტესტო აქციიდან ავტომანქანით წაიყვანეს.

„ავტომობილში ყოფნისას კახა მიქელაძემ ალექსანდრე თევზაძის მიერ საჯაროდ გამოხატული პოლიტიკური და სხვა შეხედულების ნიშნით შეუწყნარებლობის მოტივით, სახის არეში ხელის დარტყმით ფიზიკური შეურაცხყოფა მიაყენა ალექსანდრეს…“ – აღნიშნულია განაჩენში.

ჩხუბი კაფე „კონტესთან“ გაგრძელდა.

„ურთიერთშელაპარაკების ნიადაგზე წარმოშობილი ჩხუბის დროს, ირაკლი აბუსერიძემ ცივი იარაღის – დანის გამოყენებით, ალექსანდრე თევზაძეს მიაყენა მსუბუქი ხარისხის დაზიანება თავისა და მარცხენა მტევნის პირველი თითის არეში, რამაც ამ უკანასკნელის ჯანმრთელობის ხანმოკლე მოშლა გამოიწვია,“ – წერია განაჩენში.

ამ ინციდენტის შემდეგ კახა მიქელაძე და ირაკლი აბუსერიძე დააკავეს, თუმცა მათი გირაოს საფუძველზე გათავისუფლება პროკურორმა დაკავებიდან რამდენიმე დღეში – 26 ივნისის სასამართლო სხდომაზე მოითხოვა. მაშინ მოსამართლე ვიოლეტა ფორჩხიძემ აღნიშნა, რომ პროკურატურის ეს დამოკიდებულება „შეღავათიანია“ და მსგავსი შემთხვევა არ ახსენდება.

სასამართლო პროცესს ესწრებოდა ირაკლი ჭეიშვილიც. იგი აჭარის უმაღლესი საბჭოს ფრაქცია „ქართული ოცნების“ ხელმძღვანელია და კახა მიქელაძის მეგობარი. მაშინ ირაკლი ჭეიშვილმა „ბათუმელებს“ უთხრა, რომ პოლიტიკური გავლენა პროკურატურაზე, ან სასამართლოზე გამორიცხულია.

„პროკურატურა დაეყრდნო ექსპერტიზის დასკვნას, რომლის მიხედვითაც ალეკო თევზაძეს მხოლოდ მსუბუქი ხასიათის დაზიანებები ჰქონდა… რატომ გაუსვა ამას ხაზი მოსამართლემ, არ ვიცი,“- აღნიშნა ირაკლი ჭეიშვილმა „ბათუმელებთან“.

ბრალდებულებმა ბრალი დაკავებიდან რამდენიმე დღეში აღიარეს. სასამართლომ მათ მიმართ სასჯელის მინიმალური ოდენობა გამოიყენა. ორივე მსჯავრდებულს ჯარიმიდან 500-500 ლარი ჩამოაკლდებათ რამდენიმე დღით პატიმრობისთვის.

____________________

ფოტოზე: ბრალდებული კახა მიქელაძე ბათუმის საქალაქო სასამართლოსთან. ფოტო: „ბათუმელების“ არქივიდან

 

გადაბეჭდვის წესი


ასევე: