მთავარი,სიახლეები

მერიის პროექტი ძველი ბათუმის ეზოების მოწყობაზე ამ დრომდე ვერ შედგა 

16.10.2019 • 1509
მერიის პროექტი ძველი ბათუმის ეზოების მოწყობაზე ამ დრომდე ვერ შედგა 

ბათუმის მერია 2019 წელს ძველ ბათუმში 9 ეზოს კეთილმოწყობას გეგმავდა, რისთვისაც 87 200 ლარი ჰქონდა გათვალისწინებული, თუმცა მერიამ ამ დრომდე ვერ მოახერხა მომსახურების შესყიდვა. 9 ეზოზე გამოცხადებული ტენდერი უარყოფითი შედეგით დასრულდა, რის შემდეგაც მერიამ ეზოების რაოდენობა – სამამდე, თანხა კი 30 ათას ლარამდე შეამცირა. ამის მიუხედავად, უარყოფითი შედეგით დასრულდა მეორე ტენდერიც.

მერია ეზოების კეთილმოწყობას ბათუმის ისტორიული განაშენიანების საზღვრებში ეკონომიკური, სოციალური და კულტურული ცენტრების განვითარების მხარდაჭერის პროგრამის ფარგლებში გეგმავდა.

ამჯერად იგეგმებოდა სამი ქუჩის – ზ. გამსახურდიას ქ. N43; მემედ აბაშიძის ქ. N35 და ნინოშვილის ქ. N3 – კეთილმოწყობა.

პირველ ტენდერში მონაწილე „პატიო არტს“ სატენდერო კომისიამ დისკვალიფიკაცია მისცა, მეორე ტენდერში გამარჯვებულმა „კრეატივ-ჯგუფმა“ კი, ხელშეკრულების გაფორმებაზე თავად განაცხადა უარი. მიზეზად კომპანია ხარჯთაღრიცხვაში დღგ-ს გაუთვალისწინებლობას ასახელებს. „კრეატივ-ჯგუფი“ სამი ეზოს კეთილმოწყობას მერიას 29 699 ლარად სთავაზობდა.

„კრეატივ-ჯგუფის“ წერილი ბათუმის მერიის სატენდერო კომისიას

კომპანიის ამ წერილის შემდეგ სატენდერო კომისიამ ტენდერს მიანიჭა სტატუსი – „დასრულდა უარყოფითი შედეგით“. სხვა პრეტენდენტი ტენდერში არ მონაწილეობდა.

გამოაცხადებს თუ არა მერია ეზოების კეთილმოწყობაზე ტენდერს წელს მესამედ? – მერიაში „ბათუმელებს“ უთხრეს, რომ ამ დროისთვის კონკრეტული გადაწყვეტილება მიღებული არ არის.

ამ თემაზე:

ხელახალი ტენდერი ძველ ბათუმში ეზოების მოწყობაზე – ამჯერად 3 ეზო, 9-ის ნაცვლად 

მთავარი ფოტო: ეზო, ნინოშვილის ქ. N3 / ესკიზი /სატენდერო დოკუმენტებიდან

გადაბეჭდვის წესი


ასევე: