„ენერგო-პრო ჯორჯიამ“ ქალაქ ბათუმში მოსალოდნელი დატვირთვის გამო ახალი მომხმარებლების მიერთების ვადის გაზრდის შესახებ განცხადებებით სემეკს მიმართა. კომპანიის განცხადებების განხილვა სემეკში 2019 წლის 23 ოქტომბრის სხდომაზეა ჩანიშნული.
რამდენი ახალი მომხმარებელი ითხოვს ქსელზე მიერთებას და რა ვადას ითხოვს ენერგოკომპანია? – საქართველოს ენერგეტიკისა და წყალმომარაგების მარეგულირებელ ეროვნულ კომისიაში [სემეკი] „ბათუმელებს“ უთხრეს, რომ ამ ეტაპზე ინფორმაციას ვერ მოგვაწვდიან.
„დეტალებზე მხარეები [მათ შორის ენერგოკომპანიაც] დააფიქსირებენ თავიანთ პოზიციას ღია სხდომაზე. იქნება ზეპირი მოსმენა, სემეკი განიხილავს მათ არგუმენტებს და ამის შემდეგ შეგვეძლება ინფორმაციის მოწოდება,“ – გვითრეს სემეკში.
„ბათუმელები“ დაუკავშირდა „ენერგო-პრო ჯორჯიასაც“, სადაც ასევე გვითხრეს, რომ აღნიშნულ საკითხზე კომენტარს ვერ გააკეთებენ, ვიდრე სემეკში მოსმენა არ გაიმართება.
ბათუმში ვერ ხერხდება მსხვილი ობიექტების ქსელზე დაერთება. პრობლემის მოსაგვარებლად „ენერგო-პრო ჯორჯია“ აცხადებდა, რომ აუცილებელი იყო ელექტროგადამცემი ხაზის „ერგე 1“-ის რეაბილიტაცია, რომელსაც მოსახლეობის წინააღმდეგობის გამო ვერ ახერხებდა.
მოგვიანებით კომპანიამ დაიწყო ამ ხაზის რეაბილიტაცია და სამუშაოები 2019 წლის ოქტომბრის ბოლოს უნდა დასრულდეს.
მიუხედავად ამისა, როგორც „ენერგო-პრო ჯორჯიაში“ განაცხადეს, სამომავლოდ მოსალოდნელია ბათუმში მოხმარების კიდევ უფრო ზრდა და მხოლოდ „ერგე-1“-ის რეაბილიტაცია საკმარისი არ არის ქალაქის ენერგომომარაგებისთვის.
„კომპანიამ დაიწყო ალტერნატიული წყაროების მოძიება. ამ ეტაპზე მიმდინარეობს ახალი, მაღალი ძაბვის ელექტროგადამცემი ხაზის – „ჭარნალი110“-ის პროექტირების სამუშაოები. ხაზის მშენებლობას უშუალოდ სამუშაოების დაწყებიდან დაახლოებით წელიწად-ნახევარი დასჭირდება. აღნიშნული ხაზის მშენებლობისთვის და ბათუმში გამანაწილებელი ქსელის გამართვის სამუშაოებისთვის საჭირო იქნება, სავარაუდოდ, 25 000 000 ლარის ინვესტიციის განხორციელება“, – აცხადებს „ენერგო-პრო ჯორჯია“.
ამ თემაზე:
ბათუმის დენით მომარაგებისთვის „ერგე 1“ საკმარისი არ არის – იგეგმება ახალი ხაზის მშენებლობა
