შს სამინისტროს ინფორმაციით, განსაკუთრებით დიდი ოდენობით ნარკოტიკული საშუალების საქართველოში უკანონოდ შემოტანის ბრალდებით სამხრეთ აფრიკის მოქალაქე დააკავეს.
„პოლიციამ და შემოსავლების სამსახურის საბაჟო დეპარტამენტის თანამშრომლებმა, ერთობლივად ჩატარებული ღონისძიებების შედეგად, 1984 წელს დაბადებული ლ.მ. ბათუმის საერთაშორისო აეროპორტში იმ დროს დააკავეს, როდესაც იგი განსაკუთრებით დიდი ოდენობით ნარკოტიკული საშუალება „მარიხუანის“ საქართველოში უკანონოდ შემოტანას ცდილობდა. სამართალდამცველებმა 16 კილოგრამი „მარიხუანა“ ნივთმტკიცებად ამოიღეს“, – წერია შსს-ს მიერ გავრცელებულ განცხადებაში.
დანაშაული 15-დან 20 წლამდე ან უვადო თავისუფლების აღკვეთას ითვალისწინებს.
შს სამინისტრომ დღეს ასევე გამოაქვეყნა მონაცემები 2019 წლის პირველი იანვრიდან დღემდე უწყების მიერ ქვეყნის მასშტაბით ამოღებული ნარკოტიკული ნივთიერებების ოდენობის შესახებ: „25 კილოგრამი “ჰეროინი”, 1 კილო და 950 გრამი “კოკაინი”, 11 600 აბი “სუბუტექსი” და “სუბოქსინი”, 4000 აბზე მეტი “ექსტაზი”, 9 კილო და 600 გრამი ფსიქოაქტიური ნივთიერება და 1 კილო და 200 გრამი ფსიქოტროპული პრეპარატები“.
