ყველაზე მაღალი შენობა ბათუმში – სანაპიროზე 200 მეტრი სიმაღლის კოშკის აშენება იგეგმება


პროექტის განხორციელების შემთხვევაში, შპს „რივიერა ბათუმის“ ერთ-ერთი კოშკი ბათუმში ყველაზე მაღალი შენობა იქნება. კომპანიის მიერ ბათუმის მერიაში წარდგენილი განაშენიანების რეგულირების გეგმის მიხედვით, ხუთი თაუერიდან ერთ-ერთი კოშკის სიმაღლე 200.60 მეტრი იქნება. სწორედ ეს 56-სართულიანი კოშკი იქნება ბათუმში ყველაზე მაღალი შენობა.

ბათუმის მერიაში გვითხრეს, რომ ამ დროისთვის ბათუმში ყველაზე მაღალი შენობა შპს „რივიერას“ ტერიტორიის მიმდებარედ არსებული პორტა თაუერია. მისი სიმაღლე 150-მეტრამდეა. შესაბამისად, „რივიერა ბათუმის“ ერთ-ერთი კოშკი ამ შენობაზე 50 მეტრზე მეტით მაღალი იქნება.

გარდა ამ კოშკისა, „რივიერა ბათუმი“ ბათუმის კონცხზე კიდევ ოთხ ცათამბჯენის აშენებას გეგმავს. ერთი – 42-სართულიანი კოშკის სიმაღლე, რომლის აშენებაც ნაპირთან ყველაზე ახლოს იგეგმება, 159 მეტრი იქნება [კოშკის ზომები – 50×50 მ]. კოშკს ექნება ღრმა საძირკვლები და 40 მ-ზე მეტი სიგრძის ხიმინჯებზე დადგება.

პროექტის რენდერის მიხედვით, პირველი  კოშკი [სანაპირო ზოლთან ყველაზე ახლოს] სანაპირო ხაზიდან ჩრდილო-აღმოსავლეთის მიმართულებით 150 მ-ში მდებარეობს.

მესამე 174,10 მეტრი სიმაღლის თაუერი 47-სართულიანი იქნება.

სამშენებლო პროექტი კიდევ ორ თაუერს მოიცავს, რომელთა სიმაღლეები 100,60 [26 სართული] და 114,60 [29 სართული] მეტრი.

მთავარი ფოტო: პროექტის რენდერიდან

 

ნეტგაზეთის მასალების სხვა გამოცემებში გადაბეჭდვის წესი
ავტორი