ნეტგაზეთი • RU

ქობულეთის სამედიცინო ცენტრში მალთაშუა დისკის მკურნალობა მინიინვაზიური მეთოდით დაიწყეს

 

ქობულეთის სამედიცინო ცენტრში მალთაშუა დისკის პროტრუზიოს მკურნალობა დაიწყეს მინიინვაზიური მეთოდით – მალთაშუა დისკექტომია ლაზერით – ინფორმაციას ამის შესახებ აჭარის მთავრობის ვებგვერდი ავრცელებს. 

ადგილობრივი ანესთეზიის ქვეშ, დაზიანებული დისკის დონეზე მცირე ზომის კათეტერით შეჰყავთ ლაზერი მალთაშუა დისკის არეში, რისი მეშვეობითაც მცირდება მალთაშუა დისკის მოცულობა და ხდება სპინალური ნერვის დეკომპრესია ანუ განთავისუფლება.

ნეიროქირურგ ნუგზარ გურგენიძის განმარტებით მსგავსი სახის სამედიცინო მომსახურება საქართველოში პირველად ჩატარდა. ნუკლეოპლასტიკის უპირატესობები ღია ოპერაციასთან შედარებით არის: მცირე ინვაზია – ღია ოპერაციის ჩატარების თავიდან აცილება; ჰოსპიტალიზაციის მცირე დრო – 1 საწოლდღე; პროცედურა ტარდება ადგილობრივი ანესთეზიით; რეაბილიტაციის მოკლე დრო; მცირე ინვაზიისა და ზოგადი ანესთეზიის არ საჭიროების გამო გართულებების და სხვა ორგანოების დაზიანების რისკი გაცილებით დაბალია; რეციდივი ღია ოპერაციასთან შედარებით დაბალია; ეფექტურობა 80 %.

ქართველმა მედიკოსებმა პირველი ოპერაცია თურქ კოლეგებთან ერთად ჩაატარეს. ოპერაციის მიმდინარეობის პროცესს აჭარის ჯანდაცვის მინისტრის მოადგილეები: ლევან გორგილაძე და ზურაბ თენიეშვილი გაეცნენ. აღნიშნული ოპერაცია ფინანსდება საყოველთაო ჯანდაცვის პროგრამის ფარგლებში. 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"