შავი ზღვის ჯაზფესტივალის პირველი დღე ბათუმში

18.07.2019

ბათუმელები/ნეტგაზეთის დამფუძნებელი და დირექტორი მზია ამაღლობელი დააპატიმრეს.
ბათუმელები/ნეტგაზეთი, როგორც დამოუკიდებელი და გავლენებისგან თავისუფალი მედიასაშუალება, რომელიც მზია ამაღლობელმა 2001 წელს დააფუძნა, მიიჩნევს, რომ ის არის რუსული რეჟიმის სინდისის პატიმარი, არ აპირებს შეგუებას, ითხოვს მის დაუყოვნებლივ გათავისუფლებას და აგრძელებს ბრძოლას სიტყვის თავისუფლებისთვის.

შავი ზღვის ჯაზ-ფესტივალი დღეს, 18 ივლისს Cory Henry & The Funk Apostles-მა გახსნა. ბლუზის, სოულის, გოსპელისა და ჯაზ ფანკის ნაზავ მუსიკას შვიდი მუსიკოსისგან შემდგარი ბენდი მსმენელის წინაშე 9 საათიდან უკრავდა, მანამდე კი ჯაზის ახალგაზრდა ვარსკვლავთან შესახვედრად მსმენელი დიჯეი გიორგი მაჩაიძემ მოამზადა რამდენიმე ტრეკით.

კორი ჰენრიმ ჯგუფი Funk Apostles სხვადასხვა დროს გაცნობილი მუსიკოსებისგან შეკრიბა.

ნიუ იორკულ ბენდს ჟურნალი Rolling Stones-ი „პლანეტაზე ჩვენი დროის ერთ-ერთ ყველაზე უნივერსალურ ბენდად“ მოიხსენიებს.

ბენდის ლიდერი 32 წლის მუსიკოსი კორი ჰენრია, რომელიც 2 წლიდან უკრავს ფორტეპიანოზე და 6 წლიდან დგას სცენაზე. კლავიშზე კორი ჰენრის დაკვრის მანერას ხშირად ადარებენ ჰერბი ჰენკოკისა და ოსკარ პიტერსონის სტილს.

შავი ზღვის ჯაზფესტივალი ბათუმში, 2019 წელი

ბრიტანელი ტურისტები, ჯეინ ფაიფერი და სტივ ქეარი საქართველოში წელს პირველად ჩამოვიდნენ სამოგზაუროდ ინგლისიდან, ჯაზფესტივალზე სპონტანურად აღმოჩნდნენ, ინტერნეტში ფესტივალის აფიშას წააწყდნენ და სასიამოვნო შესაძლებლობა მელომანებმა ხელიდან არ გაუშვეს.

„ეყოს მსოფლიოს რაც კომუნიზმი ჯაზს კრძალავდა, ახლა ჩვენ თავისუფალი ერები ვართ, ვუსმენთ რასაც გვინდა, ჯაზფესტივალზე ვართ ქვეყანაში, სადაც სულ რამდენიმე ათეული წლის წინ ჯაზი იკრძალებოდა სისტემისგან, ეს თავისუფლება მშვენიერია“ – ამბობს სტივ ქეარი.

ბრიტანელი ტურისტები შავი ზღვის ჯაზფესტივალზე

ამ პულტიდან იმართება მთელი ჯაზფესტივალი და ძალიან სასიამოვნო სანახავია, როგორ აცეკვებს მთელ დარბაზს და აბალანსებს ხმებს საუნდჩექერი, რომელიც თავად ძალიან მშვიდად გამოიყურება, თუმცა აცეკვებული ხალხის რიტმი, მთლიანად მის მიერ დაბალანსებულ ხმაზეა დამოკიდებული.

შავი ზღვის ჯაზფესტივალი ბათუმში, 2019 წელი

კორი ჰენრიმ, რომელიც დღეს ბათუმის ჩოგბურთის კორტებიდან უმღეროდა მსმენელს, მუსიკალური კარიერა 2006 წელს დაიწყო და მისმა სამივე ალბომმა გამოსვლისთანავე დაიკავა მსოფლიო ჩარტებში მთავარი პოზიციები. ჰენრის სინგლები ჯაზისა და გოსპელის საუკეთესო მაგალითებადაა მიჩნეული.

https://www.facebook.com/batumelebi/videos/2430674320311766/?__xts__[0]=68.ARAOoydc9EOj3rZoaFtz2Xowpegl83jEJeTvMxhb5dQxOmNVUxL7eT6yIWX-zK_QZDPnaq80GpoUZFMejyu6dXA73XPPdCDlAb0FcHrDkI4b3NPQFzHP-8VKDYsHIWc0GJ1XWizE97facPHpVGqyFPWZKpXDxcRusidZwRWtj8EMN5GRNjCLLEycMp9LoKMRQQm6XSiZu_6IB8cZoNrB0rh7z-uZo3FdvDylYnuSEMBVmJoSL5wJas5SbiCivW7jQKzB6xg8la4QNvVByJ7ANNmbKNz3eiAlWj0mnNTam_a7E0JXLb77Go3cFtDJSsxrRcIvPYodZVI3sJGoq2hDTqLuWnFajgkY_v2KOQ&__tn__=-R

ცოტა ,,ჟუჟუნა ღვინო“, ცოტა ჟუჟუნა წვიმაც და მსმენელი მზადაა ამერიკული ბენდის ჟღერადობაზე ასაცეკვებლად, ასე იქნება ხვალაც და ზეგაც, როცა ბათუმის ჩოგბურთის კორტებზე კორი ჰენრის Kraak & Smaak, MokuMoku და Incognito შეცვლის. დაველოდოთ.