Batumelebi | რატომ არის ახალი ვოლიერების ყველა კედელი დახურული ბათუმის ცხოველთა თავშესაფარში რატომ არის ახალი ვოლიერების ყველა კედელი დახურული ბათუმის ცხოველთა თავშესაფარში – Batumelebi
RU | GE  

რატომ არის ახალი ვოლიერების ყველა კედელი დახურული ბათუმის ცხოველთა თავშესაფარში

ბათუმის მერიის ცნობით, მიუსაფარი ცხოველების თავშესაფარში დამატებითი სივრცეები მოეწყო. ახალი ვოლიერები ლეკვებისთვისაა განკუთვნილი და 6 საკარანტინო და 10 საცხოვრებელ ვოლიერს მოიცავს.

დახურული ვოლიერი შენობაში

ცხოველთა უფლებების კომიტეტის ხელმძღვანელი თინათინ ჭავჭანიძე „ბათუმელებთან“ ამბობს, რომ ვოლიერის წინა მხარე გამჭვირვალე უნდა იყოს, რადგან ცხოველისთვის აუცილებელია ხედვის არეალი ჰქონდეს.

„გარდა ამისა, პირველ რიგში, ეს ვეტერინარისთვის არის მნიშვნელოვანი, რომ ჩამოვლის დროს ხედავდეს რა მდგომარეობაშია ცხოველი და ყველა კარის გამოღება არ უწევდეს. ოთხივე მხრიდან ვოლიერის დახურვა სტანდარტის დარღვევაა. ამერიკაში, ინგლისში, ინდოეთში, ესპანეთში, თურქეთში, სადაც მინახავს ვოლიერები, მსგავსი არსად არ არის.

წინა ნაწილი უნდა იყოს ან მინის, ან ბადის.  ეს ვოლიერები, რაც ბათუმის თავშესაფარში გააკეთეს, ძალიან ჰგავს საზოგადოებრივ ტუალეტს,  როგორც ჩანს, აქედან აიღეს მოდელი და პრაქტიკული სულაც არ არის,“ – გვითხრა თინათინ ჭავჭანიძემ.

მისი თქმით, მსგავსი ვოლიერების გაკეთების მცდელობა ჰქოდათ თბილისში, მერიის თავშესაფარშიც: „რადგან როცა მოდიოდნენ ვიზიტორები და ხედავდნენ ცუდ მდგომარეობაში მყოფ ცხოველებს, ამაზე ტყდებოდა ერთი ამბავი. ზრდასრული ძაღლები ცდილობდნენ კედელზე აფოფხებას და ზემოდან გადმოხედვას. ძაღლი უნდა ხედავდეს სად არის, რაღაც ხედვის არეალი უნდა ჰქონდეს, ბუდრუგანაშიც კი არ კეტავენ ძაღლს დახურულ სივრცეში“.

ჭავჭანიძის თქმით, კარანტინის შემთხვევაშიც, ვოლიერის წინა  მხარე გამჭვირვალე უნდა იყოს: „მესმის, რომ კაფელი ადვილად მოსარეცხია, მაგრამ რა ხდება ვოლიერში რატომ არ უნდა ვხედავდეთ“.

ცხოველთა თავშესაფარი ბათუმში კომპანია CEBEP-ის დაარსებულია და იგი ბოლო ოთხი წელია ბათუმის მერიის მიერ გამოცხადებულ ტენდერს იგებს.

შპს „სევერთან“ წელს ბათუმის მერიას 314 000 ლარზე აქვს ხელშეკრულება გაფორმებული მიუსაფარი ცხოველების მოვლა-პატრონობისა და პოპულაციის რეგულირებისთვის.

ბათუმის ცხოველთა თავშესაფრის დამაარსებელი კომპანია CEBEP-ის ნდობით აღჭურვილი პირი, ჯემალ გოგიტიძე ამბობს, რომ ახალი ვოლიერები ლეკვებისთვის გაკეთდა, რომ იზოლირებული იყვნენ.

„ესე იგი, არასწორად გავაკეთეთ? ჩვენ გვეგონა, რომ კარგ საქმეს ვაკეთებდით. მოვიდნენ სპეციალისტები, წაგვაკითხონ, გვაჩვენონ სად წერია, რომ არ შეიძლება და თუ მართლა არასწორად გავაკეთეთ, გამოვასწორებთ,“- გვითხრა მან.

ბათუმის მერიის პროგრამის ფარგლებში, მიუსაფარი ცხოველების მოვლა-პატრონობისა და პოპულაციის რეგულირების მიზნით, გათვალისწინებულია შემდეგი ღონისძიებები:

ცხოველების (ზრდასრული ძაღლი, კატა) დაჭერა და ტრანსპორტირება ვეტერინარულ კლინიკამდე. სტერილიზაცია, კასტრაცია, კვება, ვაქცინაცია, დაბირკვა და საჭიროების შემთხვევაში, ევთანაზია.

ბუნებრივ არეალში გაშვებული დაბირკული, გასტერილებული ცხოველების ეტაპობრივი გამოყვანა ქალაქის ტერიტორიიდან და ტრანსპორტირება ვეტერინარულ კლინიკაში რევაქცინაციასთან დაკავშირებული პროცედურების ჩატარების მიზნით;

მოზარდი ცხოველების (ლეკვი, კნუტი) აყვანა ქალაქის ტერიტორიიდან და ტრანსპორტირება თავშესაფარში (ვეტერინარული კლინიკა) მოვლა-პატრონობისა და გაშვილების მიზნით.

2019 წლის მარტში ბათუმის ცხოველთა თავშესაფარი სკანდალში გაეხვა. მოქალაქეები ამბობდნენ, რომ ბათუმში ცხოველები ქუჩებიდან მიჰყავთ და სტერილიზაციის შემდგომ ისევ ქუჩაში დაბრუნების ნაცვლად ხოცავენ და ბეიკერის ორმოში ყრიან. ჯემალ გოგიტიძემ გავრცელებულ ინფორმაციას ცილისწამება და „პროვოკაცია“ უწოდა. მაშინ მან „ბათუმელებს“ უთხრა, რომ  „ბეიკერის ორმოში“ მკვდარ ცხოველებს მარხავენ, თუმცა მხოლოდ იმ ცხოველებს, რომლებიც დაავადებულები არიან, ამის გამო მათი ევთანაზია მოხდა და ამის დამადასტურებელი დოკუმენტაციაც არსებობს. მან თქვა, რომ მისთვის გაუგებარია, როგორ გახსნეს „ბეიკერის ორმო“, რომელიც ბოქლომით იყო ჩაკეტილი. ამ ფაქტზე შს სამინისტრომ ცხოველებისადმი სასტიკი მოპყრობის მუხლით ბათუმში გამოძიება დაიწყო, რომელიც ამ დრომდე გრძელდება.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com