გარემოვაჭრეები, რომლებიც ბათუმის მერიამ ამ წლის დასაწყისში წერეთლის ქუჩიდან აყარა და ავტოსადგურის ტერიტორიაზე გამოუყო ადგილი, დღეს მორიგ აქციას მართავენ. ისინი აცხადებენ, რომ ავტოსადგურის ტერიტორიაზე ვაჭრობა საერთოდ არ აქვთ და პურსაც კი ვეღარ ყიდულობენ.
გარემოვაჭრეები ალტერნატიულ ფართობს ითხოვენ და ამ მოთხოვნით აჭარის მთავრობის სახლთან აპირებენ შეკრებას. მოვაჭრეთა თქმით, ბათუმის მერია ვერ ეხმარება მათ და ტერიტორია, რომელიც ავტოსადგურში გამოუყვეს, არარენტაბელურია.
“სანამ თორნიკე რიჟვაძე არ შეგვხვდება, მანამ არ ვაპირებთ რაიმე კომენტარის გაკეთებას“, – აცხადებენ აქციის მონაწილეები და ფეხით მიემართებიან აჭარის მთავრობის ადმინისტრაციული შენობისკენ.
განახლება
გარემოვაჭრეები უკვე [12:00] აჭარის მთავრობის სახლის წინ შეიკრიბენ და აჭარის მთავრობის თავმჯდომარესთან, თორნიკე რიჟვაძესთან შეხვედრას ითხოვენ. მთავრობის ადმინისტრაციული შენობიდან მათთან შესახვედრად ჯერჯერობით არავინ გამოსულა. მოვაჭრეებთან მივიდა ბათუმის მერიის წარმომადგენელი ჯუმბერ კობალაძე.
გარემოვაჭრეები მთავრობის ადმინისტრაციულ შენობასთან პოლიციელების გარემოცვაში
“გვეგონა, ჩაის საკრეფად რომ ხალხი წავიდოდა, ის ხალხი მაინც იყიდდა რამეს და ამოძრავდებოდა ბაზრობა. საათი ისე გადის, კაცი არ შემოდის სავაჭროდ. თავიდან იმედით დაგთანხდმით იქ გადასვლაზე. ხუთი თვეა ვუყურებთ, ვაჭრობა არაა. ვერ ვმუშაობთ. რა ვქნათ? როგორ ვიცხოვროთ?”- ჰკითხეს მოვაჭრეებმა მერიის წარმომადგენელს, ჯუმბერ კობალაძეს.
გარემოვაჭრეები მთავრობის ადმინისტრაციის გადაწყვეტილებას ელიან.
________________
ამავე თემაზე:
