მთავარი,სიახლეები

15 ათასი ლარი ჯარიმა შუქის, გაზისა და წყლის უკანონო მოხმარებისთვის – დავა საკონსტიტუციოში

28.05.2019 • 1714
15 ათასი ლარი ჯარიმა შუქის, გაზისა და წყლის უკანონო მოხმარებისთვის – დავა საკონსტიტუციოში

საკონსტიტუციო სასამართლო დღეს, 28 მაისს, არსებითად განიხილავს „ახალგაზრდა დემოკრატების“ სარჩელს პარლამენტის წინააღმდეგ. დავის საგანი ის სამართლებრივი ნორმაა, რომელიც ადმინისტრაციულ პასუხისმგებლობას – ჯარიმას აწესებს ელექტროენერგიის, ბუნებრივი აირისა და სასმელი წყლის განმეორებით უკანონო დატაცებისთვის. მაგალითად, ელექტროენერგიის განმეორებითი უკანონო დატაცებისთვის ფიზიკურ პირი 100 ლარით ჯარიმდება, ხოლო იურიდიული პირი – 15 ათასი ლარით.

მოსარჩელე ფიზიკურ და იურიდიულ პირებს შორის ჯარიმების განსხვავებულ ოდენობას ასაჩივრებს. მისი მტკიცებით, ასეთი განსხვავება არღვევს კონსტიტუციით გარანტირებულ თანასწორობის პრინციპს.

მოსარჩელე ასევე მიიჩნევს, რომ ჯარიმის ოდენობა იურიდიული პირების შემთხვევაში შეუსაბამოდ მაღალია და იგი შესაძლოა რომელიმე ორგანიზაციის გაუქმების მიზეზიც გახდეს.

„ჯარიმა წარმოადგენს სანქციის სახეს, რომლის მიზანიც შეიძლება იყოს სპეციალური, ანუ სამართლდამრღვევი პირის მიერ ქმედების ხელმეორედ ჩადენის პრევენცია. ასევე, საერთო, სხვა პირების მიმართ პრევენციაც, თუმცა მისი ოდენობა არ უნდა იყოს იმდენად არაგონივრული, რომ ირიბად მისი მიზანი ხდებოდეს იურიდიული პირის სამომავლოდ შესაძლო ფუნქციონირების შეწყვეტა. საქართველოში არსებული სამოქალაქო ბრუნვიდან გამომდინარე, 15 000 ლარის გადახდის დავალდებულება, ძალიან ბევრი იურიდიული პირისთვის შესაძლოა წარმოადგენდეს მისი ლიკვიდაციის ტოლფას ქმედებას,“ – აღნიშნულია კონსტიტუციურ სარჩელში.

გადაბეჭდვის წესი


ასევე: