მთავარი,სიახლეები

არასწორად განთავსებული საგზაო ნიშნები ბათუმის ქუჩებში

07.05.2019 • 4658
არასწორად განთავსებული საგზაო ნიშნები ბათუმის ქუჩებში

„ეს ნიშანი გვაფრთხილებს ქვეითთა გადასასვლელთან მიახლოების შესახებ. იგი მაფრთხილებელი ნიშანია და, შესაბამისად, დასახლებულ პუნქტში ქუჩის გადაკვეთამდე 50 მეტრზე უნდა იყოს განთავსებული. ბათუმში რამდენიმე ქუჩაა, სადაც ეს მაფრთხილებელი ნიშანი არასწორად, ფორმალურად არის განთავსებული,“ – გვიყვება ბათუმის ერთ-ერთი ავტოსკოლის ხელმძღვანელი, ვიქტორ კვირკველია. მან ბათუმში რამდენიმე ქუჩა გვაჩვენა, სადაც მისი მტკიცებით, საგზაო ნიშნები ურთიერთსაპირისპირო და დამაბნეველია, ან ისინი არასწორად და ფორმალურადაა განთავსებული.

ვიქტორ კვირკველია განსაკუთრებულ ყურადღებას ქვეითთა გადასასვლელებზე აკეთებს. „ტურისტულ ქალაქში ნიშნების ამგვარი განთავსებით კიდევ უფრო გაძლიერდება შეხედულება, რომ ბათუმში ქვეითებს გზას არასდროს უთმობენ. პარლამენტარებსაც მივწერე, რომ ამას სჭირდება მიხედვა… როცა ფული იხარჯება ამ ნიშნების განთავსებაში, რატომ უნდა იყოს პრობლემა მისი არასწორად განთავსება?“ – კითხულობს ავტოსკოლის დირექტორი.

დემეტრე თავდადებულისა და ბაგრატიონის ქუჩების კვეთა

ქაქუცა ჩოლოყაშვილის პირველი შესახვევი

დემეტრე თავდადებულისა და ბაგრატიონის ქუჩების კვეთაში, ასევე ამ ქუჩების მიმდებარედ, ბევრგან ნახავთ ანალოგიურ საგზაო ნიშანს პირდაპირ გზაჯვარედინზე. განსხვავებული საგზაო ნიშანი დგას, მაგალითად, თავდადებულისა და პუშკინის ქუჩების კვეთაში არსებულ გზაჯვარედინზე. „ეს ნიშანი უნდა იდგეს, წესით, ყველა ქვეითთა გადასასვლელთან“, – დასძენს ვიქტორ კვირკველია.

დემეტრე მეფე თავდადებულისა და პუშკინის ქუჩების კვეთა

ვნახეთ სხვა კონკრეტული შემთხვევაც: სულაბერიძისა და ბაგრატიონის ქუჩების კვეთაში ერთდროულად სამი საგზაო ნიშანია. ერთი სარეკომენდაციოა, ორი – ამკრძალავი. ავტოსკოლის დირექტორი ირწმუნება, რომ ეს ნიშნები ურთიერთსაპირისპიროა.

ვიქტორ კვირკველია ბაგრატიონისა და სულაბერიძის ქუჩების კვეთაში

„სარეკომენდაციო ნიშანი სატვირთო ავტომანქანას ეუბნება, რომ რეკომენდებულია პირდაპირ იმოძრაოს. ეს ნიშანი არ კრძალავს მარცხნივ ან მარჯვნივ მოხვევას, რადგან რეკომენდაციაა. ამკრძალავი ნიშანი კი მარცხნივ მოხვევას უკრძალავს სატვირთო ავტომანქანას და მსუბუქსაც. მესამე ნიშნით ამ ქუჩაზე სატვირთო ავტომანქანის მოძრაობა საერთოდ აკრძალულია. შესაბამისად, ეს სამი ნიშანი ურთიერთსაპირისპირო და დამაბნეველია,“ – განმარტავს ვიქტორ კვირკველია.

ბაგრატიონისა და სულაბერიძის ქუჩების კვეთა

ავტოსკოლის დირექტორი გვთხოვს, დავაკვირდეთ, როგორია ამავე ქუჩების გზაჯვარედინზე ავტომანქანების მოძრაობის პრაქტიკა საგზაო ნიშნების მიუხედავად. სატვირთო ავტომანქანები ბაგრატიონის ქუჩით გადაადგილდებიან. ისინი მარცხნივ ანუ ქალაქის ცენტრისკენ არ უხვევენ. მარცხნივ მხოლოდ მსუბუქი ავტომანქანები მოძრაობენ იმის მიუხედავად, რომ ამ მიმართულებით გადაადგილება აქ განთავსებული ერთ-ერთი საგზაო ნიშნის მიხედვით აკრძალულია.

„ჩვენ არ გვაქვს ინფორმაცია საგზაო ნიშნების არასწორად განთავსების შესახებ. არც რომელიმე მოქალაქეს მოუმართავს ამ დრომდე. თუ დადგინდება, რომ საგზაო ნიშანი არასწორადაა განთავსებული, შესაძლებელია მისი შეცვლა,“ – გვითხრა შპს „ბათუმის ავტოტრანსპორტის“ ხელმძღვანელმა, ბადრი ფარტენაძემ. მერიის ეს სამსახური ერთი წელია მუშაობს საგზაო მოძრაობის ნიშნების განთავსებაზე. სამსახურის უფროსი ამბობს, რომ ამ ხნის განმავლობაში საგზაო ნიშნის არასწორად განთავსების არც ერთი შემთხვევა არ დაუფიქსირებიათ.

გადაბეჭდვის წესი


ასევე: