საბალეტო სკოლა თეატრისა და ბალერონების გარეშე [ვიდეო]


ბათუმის ვახტანგ ჭაბუკიანის სახელობის კლასიკური ბალეტის სკოლას  არსებობის ოცწლიანი ისტორია აქვს. თავდაპირველად, როგორც სასწავლებელი, ისე ფუნქციონირებდა და გასცემდა დიპლომებს, შემდეგ კი სკოლის სტატუსი მიიღო და სერტიფიკატებს გასცემს. კურსდამთავრებულს ბალეტის მსახიობის კვალიფიკაცია ენიჭება.

სკოლის მოსწავლეებს არაერთ საერთაშორისო კონკურსზე აქვთ წარმატებები მოპოვებული. მათ შორისაა 16 წლის მარიამ ცინცაძეც, რომელიც საბალეტო სკოლაში რვა წლიდან სწავლობს. სკოლას წელს დაასრულებს. როგორც ამბობს, ძალიან უყვარს თავისი საქმე, თუმცა იმის გამო, რომ ბათუმში  ბალეტის თეატრი არ არის, ზუსტად არ იცის, შეძლებს თუ არა სამომავლოდ ცეკვის გაგრძელებას.

„ბალეტი მარტო ცეკვა არ ას, რიის ჩემთვის ყველაფერია“, – გვეუბნება მარიამი. საბალეტო სკოლაში ის მამამ მიიყვანა. „არ ვიცოდი,  ბალეტი ამდენ შრომას თუ მოითხოვდა. მეგონა, მაშინვე პუანტებზე შევდგებოდი და სცენაზე ვიცეკვებდი, მაგრამ შემდეგ მივხვდი, რომ ეს ასე არ იყო“.

16 წლის ბალერინა ბათუმიდან

„ბალეტი მარტო ცეკვა არ არის, ის ჩემთვის ყველაფერია“-გვეუბნება მარიამ ცინცაძე, ბათუმის საბალეტო სკოლის მოსწავლე, რომელიც ბალეტს რვა წელია ცეკვავს. მისი თქმით, ბალეტი ძალიან დიდ შრომას მოითხოვს. „მეგონა მაშინვე პუანტებზე შევდგებოდი და სცენაზე ვიცეკვებდი, მაგრამ შემდეგ მივხვდი რომ ეს ასე არ იყო“.

Posted by ბათუმელები • Batumelebi.ge on ორშაბათი, 08 აპრილი, 2019

შარშან რიგის ფესტივალზე მესამე ადგილი აიღო. ამბობს, რომ ამ ნომინაციით ამაყობს, რადგან კონკურენცია ძალიან მაღალი იყო. თუმცა მანამდე იყო სხვა წარმატებებიც. „თუ გიყვარს ეს ხელოვნება, მისი ნაწილი უნდა გახდე“, – გვეუბნება მარიამი. გული სწყდება იმის გამო, რომ სკოლაში ბალერონები არ ჰყავთ. „მეწყვილესთან ცეკვა მაინც ძალიან მნიშვნელოვანია და ცეკვასაც უფრო უხდება. კარგი იქნება, ბიჭებიც რომ სწავლობდნენ“, – ამბობს მარიამი.

მისი აზრით, სკოლა იმ დონეზეა განვითარებული, რომ შეუძლია უფრო მეტ ქვეყანაში აჩვენოს თავისი შესაძლებლობა. „მინდა, რომ ბევრმა ბავშვმა გამოსცადოს ის სიამოვნება და ბედნიერება, რასაც დიდ სცენაზე ცეკვა განიჭებს“.

კლასიკური და სახასიათო ცეკვის პედაგოგი – „ბროლის ცერის“ მფლობელი ანი ფირცხალაიშვილი საბალეტო სკოლაში 18 წელია მუშაობს. მისი თქმით, სკოლის მიმართ დაინტერსება არ იკლებს, თუმცა მოზარდებს სტიმულისთვის თეატრი და მეტი გასტროლი სჭირდებათ.

 

ბათუმის ჭაბუკიანის სახელობის საბალეტო სკოლა.
ფოტო: ლელა დუმბაძის

„უცხოეთში რომ გავემგზავროთ, ამის ფინანსური რესურსი სკოლას არ აქვს. მხოლოდ ორჯერ ვიყავით. ერთხელ იტალიაში გაემგზავრა ჩვენი მოსწავლე ია ხუციშვილი, რომელიც ჟიურის წევრს იმდენად მოეწონა, რომ  მასტერკლასებზე მიიწვია და ერთიც რიგაში – მე და ჩემი მოსწავლე ვიყავით, იქაც დაფინანსება მოვიპოვეთ და ისე წავედით“, – გვეუბნება ანი ფირცხალაიშვილი.

პედაგოგის თქმით, კონკურსებში მონაწილეობა ძალიან მნიშვნელოვანია მოცეკვავისთვის – გარდა იმისა, რომ საკუთარი შესაძლებლობას წარმოაჩენ, სხვა ქვეყნების გამოცდილებასაც იზიარებ. „ბალერინას შრომას ხშირად მეშახტეს შრომას ადარებენ, იმდენად შრომატევადია ეს პროფესია, ამიტომ როცა ამდენს აკეთებ, გინდა სხვასაც აჩვენო. ამ ბავშვებს ნებისმიერ თეატრში შეუძლიათ ცეკვა გაარძელონ, მათ შორის ევროპის სცენაზეც“, – გვეუბნება პედაგოგი.

ამ დროისთვის სკოლაში 120 ბავშვი სწავლობს. სკოლაში 7-8 წლის ასაკის ბავშვებს იღებენ, თავდაპირველად მოსამზადებელ კლასში, პირველ კლასში კი ის გადავა, ვისაც შესაბამისი მონაცემები აღმოაჩნდება.

მარიამ ცინცაძე რეპეტიციის დროს.
ფოტო: ლელა დუმბაძის

სკოლას  დაარსების პირველ წლებში ბალერონები ანუ ბიჭი მოცეკვავეებიც ჰყავდა, თუმცა თანდათან მათი რაოდენობა შემცირდა. დღეს სკოლაში არც ერთი ბიჭი არ სწავლობს.

პედაგოგის აზრით, საბალეტო სკოლაში ბიჭების არარსებობა გარკვეულ სტიგმებს უკავშირდება. „რატომღაც მიიჩნევა, რომ ბალეტი ნაზი, ქალური პროფესიაა, ასევე ძლიერი სტიგმა მუშაობს ბიჭის სექსუალურ ორიენტაციასთან დაკავშირებით. თუმცა ასე ნამდვილად არ არის, ბალერონი უნდა იყოს ძლიერი ფიზიკურადაც, რადგან პარტნიორი უნდა აიყვანოს ხელში. წლების წინ ხუთი კარგი მონაცემების ბიჭი მოსწავლეებიც მყავდა, თუმცა გარდატეხის ასაკის შემდეგ, „სკოლიდან გაქრნენ“, – გვეუბნება პედაგოგი.

რეპეტიციის დროს

ბალეტი, გარდა შრომისა, მოითხოვს პროფესიისადმი სიყვარულს. „ჩვენ ვცდილობთ ჩავუნერგოთ ეს სიყვარული, თუმცა იმდენად დიდი დატვირთვაა, რომ ყველა ვერ უძლებს. ერთ-ერთ კლასში 12 გოგონა იყო, დარჩა სამი. ვერ გაუძლეს“, – გვეუბნება მასწავლებელი.

მოსწავლეები კლასიკურ ვარიაციებს და თანამედროვე ცეკვებს ამზადებენ.  საკონკურსოდ, ძირითადად, კლასიკური ვარიაციები გააქვთ.

პედაგოგსა და მოსწავლეებს სხვადასხვა ფესტივალსა და კონკურსზე საკმაოდ პრესტიჟული ნომინაციები აქვთ მოპოვებული. სამომავლოდ კიდევ გეგმავენ საერთაშორისო კონკურსებში მონაწილეობას. მაისის ბოლოს კი, საბალეტო სკოლა კიდევ ერთ საერთაშორისო კონკურსზე გაემგზავრება.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com