ბათუმში ყველაზე მეტი მგზავრი #1 და #1ა ავტობუსს ჰყავს. ყოველ შემთხვევაში, ასეთია 2019 წლის იანვრის სტატისტიკა – ზამთრის პირველ თვეს ამ ხაზის ავტობუსებით ბათუმში ჯამში 181 809 მგზავრმა ისარგებლა.
#1 და #1ა გაივლიან რუსთაველის ქუჩას, სადაც არ მოძრაობენ სამარშრუტო ტაქსები. რუსთაველის ქუჩაზე მდებარეობს ბათუმის შოთა რუსთაველის უნივერსიტეტი და ასევე, საზღვაო აკადემია, შესაბამისად, ამ მარშრუტის პოპულარობა ამ გარემოებითაც აიხსნება.
იანვრის თვის სტატისტიკა ბათუმის ავტოტრანსპორტმა დღეს გამოაქვეყნა ფეისბუქგვერდზე. სტატისტიკის თანახმად, იანვარში მუნიციპალური ტრანსპორტით სულ 919 522-მა მგზავრმა ისარგებლა, აქედან 61 მგზავრი დაჯარიმდა უბილეთოდ მგზავრობისათვის.
სტატისტიკის თანახმად ასევე გაირკვა, რომელია ყველაზე არაპოპულარული მარშრუტი ბათუმში. ესაა #2 და #2ა, მთელი თვის განმავლობაში ამ მარშრუტებზე მუნიციპალური ტრანსპორტით სულ 21 071-მა მგზავრმა ისარგებლა.
#2 ავტობუსი მოძრაობს მარშრუტით: ადლიის დასახლება-კაჩინსკების-ხიმშიაშვილის-კობალაძის-ინასარიძის-ფიროსმანის-ჭავჭავაძის ქუჩები – თბილისის მოედანი; #2ა ავტობუსი კი შემდეგი მარშრუტით: ადლიის დასახლება-კაჩინსკების-ხიმშიაშვილის-[იუსტიციის სახლი]-გორგილაძის-ბარათაშვილის ქუჩები – თბილისის მოედანი.
