მერია ბათუმის ისტორიული განაშენიანების ზონაში გარევაჭრობის წესებს შეიმუშავებს, დღეს საკრებულომ მერიისთვის შესაბამისი გეგმარებითი დავალების დამტკიცებას მხარი დაუჭირა.
მერიის ინფორმაციით, პროექტის მიზანია ისტორიული განაშენიანების დაცვის ზონაში არსებულ საზოგადოებრივ სივრცეებში ორგანიზებული გარევაჭრობის ხელშეწყობა და სავაჭრო ობიექტების არქიტექტურული იერსახის გაუმჯობესება.
გარე ვაჭრობის საკითხებს ბათუმში სპეციალური ნორმატიული აქტი არეგულირებს, თუმცა მერიაში მიიჩნევენ, რომ ამ აქტში ხარვეზებია, რის გამოც სასურველი შედეგის მიღწევა შეუძლებელია. კონკრეტულად კი დაუზუსტებელია გარე ვაჭრობის ადგილები, სავაჭრო ინვენტარის სტანდარტი და საზოგადოებრივი სივრცეების პარამეტრები.
მერიის ინფორმაციით, გეგმის შემუშავებაში შესაბამის სამსახურებს ურბანისტი ლადო ვარდოსანიძე დაეხმარება.
