მთავარი,სიახლეები

ბათუმში ადვოკატები მოსამართლეების დამატებას ითხოვენ

15.01.2019 • 2156
ბათუმში ადვოკატები მოსამართლეების დამატებას ითხოვენ

ბათუმელი ადვოკატები მოსამართლეების დამატებას ითხოვენ. კოლექტიური განცხადების განხილვა იუსტიციის უმაღლესმა საბჭომ უკვე დაიწყო. როგორც საბჭოს პრესსამსახურში გვითხრეს, ამ საკითხზე გადაწყვეტილება ჯერ მიღებული არ არის. იუსტიციის უმაღლესი საბჭოსთვის გაგზავნილ განცხადებას ბათუმში მომუშავე 31 ადვოკატი აწერს ხელს.

„ჩვენთვის არ აქვს მნიშვნელობა, რომელი მოსამართლე მოვა. მთავარია, ვინმე დაინიშნოს. ფაქტია, რომ მოსამართლეები ვადებს არღვევენ, რადგან ბევრი საქმე აწერიათ, ჩვენ კი კლიენტები გვყავს განაწყენებული, რადგან ვერ ხდება საქმეთა განხილვა თავის დროზე. ჩვენ ვფიქრობთ, რომ მინიმუმ 5 მოსამართლე უნდა დაემატოს ბათუმის საქალაქო სასამართლოს,“ – გვითხრა ადვოკატმა თინა იმნაძემ, რომელიც განცხადებას აწერს ხელს.

რატომ არ მოაწერეს ხელი ამ მოთხოვნას სხვა ადვოკატებმა და ხომ არ ეკუთვნით ამ მოთხოვნის ინიცირება კონკრეტულ მოსამართლეებს, რომლებსაც მუშაობა ბათუმის სასამართლოში სურთ? – თინა იმნაძე ირწმუნება, რომ ინიციატივა ადვოკატებს ეკუთვნით და თავდაპირველად განცხადება ადვოკატმა შოთა ჯიბლაძემ მოამზადა.

„უბრალოდ, ყველა ადვოკატი ვერ ვიპოვეთ, ვერ მივწვდით. დარწმუნებული ვარ, ყველა ადვოკატი ეთანხმება ამ მოთხოვნას,“ – ამბობს თინა იმნაძე.

ადვოკატების განცხადება იუსტიციის უმაღლეს საბჭოში 24 დეკემბერს გაიგზავნა. საკითხის განხილვა გუშინდელი, 14 იანვრის სხდომის დღის წესრიგშიც იყო შეტანილი, მაგრამ საკითხის განხილვა გადაიდო.

 

 

გადაბეჭდვის წესი


ასევე: