Batumelebi | ბათუმის მერია ადმინისტრაციული შენობების დასაცავად 315 600 ლარს დახარჯავს ბათუმის მერია ადმინისტრაციული შენობების დასაცავად 315 600 ლარს დახარჯავს – Batumelebi

ბათუმის მერია ადმინისტრაციული შენობების დასაცავად 315 600 ლარს დახარჯავს

ბათუმის მერიას, მიმდინარე 2019 წლის განმავლობაში, ადმინისტრაციული შენობების დაცვა 315 600 ლარი დაუჯდება. ქალაქ ბათუმის მუნიციპალიტეტის მერიის ბალანსზეა შემდეგი შენობები: ბათუმი – ლ. ასათიანის ქ. №25; მ. ლერმონტოვის ქ. №90ა; ს.ს. ორბელიანის 10; ასევე, დაუმთავრებელი შენობა – ყოფილი სასტუმრო „მეზღვაური“.

მერიის ინფორმაციით, „დაცვა“-მ ცეცხლსასროლი იარაღით უნდა დაიცვას ქონება [ბათუმის მუნიციპალიტეტის მერიის ადმინისტრაციული შენობები და აღნიშნულ შენობებში არსებული მატერიალურ-ტექნიკური ბაზა], ქურდობის, ყაჩაღობის, განზრახ განადგურებისაგან ან სხვა კანონსაწინააღმდეგო ქმედებისაგან. აგრეთვე „დაცვა“ პასუხისმგებელია საზოგადოებრივი წესრიგის დაცვაზე, არ უნდა დაუშვას დასაცავ ობიექტებზე უცხო პირების შესვლა“.

ბათუმის მერიის ინფორმაციით, „ამ შენობებში განთავსებულია პერსონალური, საარქივო დოკუმენტაციები, მერიის საწყობის მატერიალურ-ტექნიკური ბაზა, აღნიშნული ობიექტები მუნიციპალიტეტისათვის წარმოადგენენ აუცილებელ დანიშნულების ობიექტებს და აუცილებელია განხორციელდეს მათი სათანადო დაცვა, ხოლო საქართველოს შინაგან საქმეთა მინისტრის შესაბამისი ბრძანებითა და საქართველოს კანონმდებლობით, ცეცხლსასროლი იარაღის გამოყენებით ობიექტის დაცვის უფლებამოსილება გააჩნია მხოლოდ სსიპ „დაცვის პოლიციის დეპარტამენტს“.

„შესყიდვის სავარაუდო ღირებულება შეადგენს 315 600 ლარს დღგ-ს ჩათვლით, რომელიც განისაზღვრა წინა წლებში ანალოგიური მომსახურების ღირებულების გათვალისწინებით, დაცვის მომსახურებაზე „დაცვის პოლიციის დეპარტამენტთან“ გაფორმებული ხელშეკრულებებისა და დასაცავ ობიექტებზე წარმოდგენილი დაცვის თანამშრომლების სახელფასო განაკვეთების საფუძველზე“ – აღნიშნულია სახელმწიფო შესყიდვების ვებგვერდზე.

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com