საქართველოს ბაზარზე სამშენებლო მასალების ხარისხი 2018 წლის 15 ნოემბრიდან მხოლოდ ევროსტანდარტების შესაბამისი უნდა ყოფილიყო, თუმცა 21 ნოემბერს შესაბამისი ტექნიკური რეგლამენტის ამოქმედება მთავრობამ 2019 წლის 15 იანვრამდე შეაჩერა.
რეგლამენტის მოთხოვნების ძალაში შესვლამდე ერთი დღით ადრე, 14 ნოემბერს კი, მთავრობამ დადგენილებაში მთელი რიგი ცვლილებები შეიტანა. მათ შორის განისაზღვრა, რომ „ტექნიკური რეგლამენტის მოქმედება არ ვრცელდება ფიზიკური პირის მიერ 30 კალენდარულ დღეში ერთხელ, ბარგით ან/და ხელბარგით შემოტანილი 500 ლარამდე ღირებულების, 30 კგ-მდე საერთო წონის სამშენებლო პროდუქტებზე, რომლებიც არ არის განკუთვნილი ეკონომიკური საქმიანობისათვის“.
ტექნიკური რეგლამენტი ეხება ცემენტს, არმატურას, ელექტროკაბელებსა და პლასტმასის მილებს. შესაბამისი სტანდარტების დასახელება კი, საქართველოს სტანდარტებისა და მეტროლოგიის ეროვნულ სააგენტოს უნდა დაედგინა.
ტექნიკური რეგლამენტის შესახებ დადგენილებაში შეტანილი ცვლილების შედეგად რეგლამენტიდან მთლიანად იქნა ამოღებული დანართი, რომელიც განსაზღვრავდა ძირითად მოთხოვნებს სამშენებლო ობიექტების მიმართ.
ცვლილებების მიხედვით, მოთხოვნები, რომლებსაც უნდა აკმაყოფილებდეს ცემენტი და ელექტროკაბელი, მოცემული იქნება იმ სტანდარტ(ებ)ში, რომელთა დასახელებასაც აქვეყნებს საქართველოს სტანდარტებისა და მეტროლოგიის ეროვნული სააგენტო; ხოლო არმატურისა და პლასტმასის მილების შემთხვევაში ასეთი მოთხოვნები უკვე მოცემულია უშუალოდ რეგლამენტის დანართში.
