18 წლის ვახტანგ ი.-ს ძარცვა ედება ბრალად. პროკურატურის ვერსიით, მან რუსი ტურისტი ბათუმში საღამოს 10 საათზე გაძარცვა. ეს შემთხვევა 24 მაისს მოხდა. 25 მაისს ვახტანგ ი. 18 წლის შესრულდა. ვახტნაგ ი. გორის მცხოვრებია.
“დანაშაულის ჩადენის დროს ის არასრულწლოვანი იყო. შესაბამისად, მას არასრულწლოვანთა მართლმსაჯულების კოდექსის შესაბამისად გაასამართლებენ”, – ამბობს გვანცა თურმანიძე, “იურიდიული დახმარების სამსახურის” იურისტი. ის ბრალდებულის ინტერესებს იცავს სასამართლოში.
გამოძიების ვერსიით, ვახტანგმა ბათუმში ჩანთა წაართვა ქალს, რომელსაც თან მცირეწლოვანი შვილი ახლდა. ჩანთაში ქალს 260 ლარი და 13 დოლარი ჰქონია. მაშინ ბათუმის ფაქტზე პოლიციამ ბრალდებული ვერ დააკავა.
ამ შემთხვევიდან რამდენიმე დღის შემდეგ ვახტანგ ი. გორში პოლიციელებმა ქურდობის ფაქტზე დააკავეს. გორის სასამართლომ მას ერთი წლით თავისუფლების აღკვეთა მიუსაჯა.
ვახტანგ ი-მ აღიარებითი ჩვენება მისცა ბათუმის საქალაქო სასამართლოსაც, ბათუმის ფაქტზე. მასთან საპროცესო შეთანხმებას აპირებს პროკურორი გიორგი რამიშვილი. მან დღეს მოსამართლე ვიოლეტა ფორჩხიძეს პროცესის გადადება სთხოვა, “იმისთვის, რომ ვიმსჯელოთ,” – დასძინა პროკურორმა.
პროკურორ გიორგი რამიშვილის თქმით, სავარაუდოდ, უკვე შეფარდებულ ერთწლიან პატიმრობაში მოექცევა ძარცვისთვის შეფარდებული სასჯელიც.
ბრალდებული დღევანდელ პროცესს არ დასწრებია.
“გუშინ დამირეკა და მითხრა, პროცესზე ჩამოსვლას, სამწუხაროდ, ვერ მოვახერხებო,” – მიმართა ადვოკატმა მოსამართლეს.
