ნეტგაზეთი • RU

მოსამართლეობა საპენსიო ასაკის შემდეგ – ყოფილი მოსამართლის დავა საკონსტიტუციოში

ყოფილი მოსამართლე ნათელა ჯაშიაშვილი პარლამენტს საკონსტიტუციო სასამართლოში უჩივის. მოსარჩელე მიიჩნევს, რომ საპენსიო ასაკი არ უნდა უზღუდავდეს ადამიანს მოსამართლეობას. ნათელა ჯაშიაშვილი ბოლოს ბათუმის საქალაქო სასამართლოს სამოქალაქო საქმეთა კოლეგიაში მუშაობდა. მას ასაკის გამო მოუხდა თანამდებობის დატოვება.

ყოფილი მოსამართლე სადავოდ მიიჩნევს კანონის „საერთო სასამართლოების შესახებ“ იმ ჩანაწერს, რომლის მიხედვითაც 10 წლის ვადით დანიშნულ მოსამართლეებს უწყდებათ უფლებამოსილება, როცა ისინი 65 წლის ხდებიან.

„სადავო ნორმა კონკრეტული მოსამართლის კვალიფიკაციის, უნარებისა თუ ჯანმრთელობის მდგომარეობის გათვალისწინების გარეშე, ბლანკეტურად ვრცელდება ყველა 65 წელს მიღწეულ პირზე. სადავო ნორმა ეწინააღმდეგება კანონის წინაშე თანასწორობისა და სახელმწიფო თანამდებობიდან თვითნებური გათავისუფლებისაგან დაცვის კონსტიტუციურ უფლებებს,“ – მიიჩნევს მოსარჩელე. 

საქმის არსებითი განხილვა დღეს, 18 ოქტომბერს, საკონსტიტუციო სასამართლოს პლენუმმა დაიწყო.

ნეტგაზეთის მასალების სხვა გამოცემებში გადაბეჭდვის წესი
ავტორი