საახალწლოდ ბათუმის გაფორმებისთვის ქალაქის ბიუჯეტიდან 428 ათასამდე ლარი დაიხარჯება


ბათუმის მერიის საქალაქო ინფრასტრუქტურისა და კეთილმოწყობის სამმართველომ „საშობაო-საახალწლო დღეებში ქალაქის გაფორმების სამუშაოების შესყიდვაზე“ ტენდერი გამოაცხადა. შესყიდვის სავარაუდო ღირებულება 428 ათას 423 ლარია.

ქალაქის გაფორმებაში შედის საახალწლო მანათობელი კონსტრუქციების, მათ შორის საახალწლო ნაძვის ხის [აქსესუარებით] მონტაჟი და დემონტაჟი.

ქალაქის მთავარი საახალწლო ნაძვის ხე ამჯერადაც ევროპის მოედანზე განთავსდება.

მანათობელი კონსტრუქციების განთავსების კონკრეტული მისამართები კი, მოცემულია ტენდერის ტექნიკურ პირობებში.

სამონტაჟო სამუშაოები უნდა განხორციელდეს ხელშეკრულების გაფორმებიდან 2018 წლის 25 დეკემბრამდე, ხოლო დემონტაჟი [დასაწყობებით ბათუმის მერიის საწყობში] – 2019 წლის 15 თებერვლამდე.

ტენდერის პირობებში აღნიშნულია, ასევე, რომ „შემდგომი გამოყენებისათვის ვარგისი, ასევე დაზიანებული [რომელიც ექვემდებარება შეკეთებას შემდგომში გამოყენების შესაძლებლობით] და შემდგომში გამოსაყენებლად უვარგისი ყველა საახალწლო აქსესუარის რაოდენობრივი ჩამონათვალის წარდგენა კეთილმოწყობის სამმართველოში უნდა განხორციელდეს 2019 წლის პირველ მარტამდე; ხოლო ყველა დაზიანებული, მაგრამ რემონტს დაქვემდებარებული და შემდგომი გამოყენებისთვის ვარგისი საახალწლო აქსესუარის შეკეთება შემდგომი დასაწყობებით უნდა განხორციელდეს 2019 წლის 25 მარტამდე“.

ტენდერში წინადადებების მიღება 2018 წლის 12 ოქტომბერს დაიწყება და 17 ოქტომბერს დასრულდება.

 

მთავარი ფოტო: საახალწლო ნაძვის ხე ევროპის მოედანზე ბათუმში / 25.12.2017 / ფოტო „ბათუმელების“ არქივიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com