მთავარი,სიახლეები

ეპარქიის პრესსპიკერი: მეუფე დიმიტრი გიორგი მამალაძის უდანაშაულობაში დარწმუნებული არ არის

30.09.2018 • 5014
ეპარქიის პრესსპიკერი: მეუფე დიმიტრი გიორგი მამალაძის უდანაშაულობაში დარწმუნებული არ არის

„დიდი მადლობა, რომ მიყვირიხართ“, – თქვა მამა იოანემ, როცა მას დღევანდელ საპროტესტო აქციაზე დეკანოზ გიორგი მამალაძის ოჯახის წევრებმა კითხვებზე პასუხი აგრესიული ფორმით მოსთხოვეს.

„თქვენ როგორ მოიქცეოდით ჩემს ადგილას?“ – ჰკითხა სასულიერო პირს დეკანოზის ძმამ.

„თქვენ მე არ მაძლევთ საუბრის საშუალებას,“ – მიმართა აქციის მონაწილეებს სასულიერო პირმა.

„თქვენ მატყუარა ხართ,“ – უთხრეს ეპარქიის პრესსპიკერს, მამა იოანეს გიორგი მამალაძის ოჯახის წევრებმა.

მიტროპოლიტ დიმიტრისგან დუმილის დარღვევა და მხარდაჭერა დღეს, 30 სექტემბერს, დეკანოზ გიორგი მამალაძის ოჯახის წევრებმა და ახლობლებმა მოითხოვეს. მათ ეპარქიის რეზიდენციასთან ბათუმში საპროტესტო აქცია გამართეს. აქციაზე ბათუმისა და ლაზეთის ეპარქიის პრესსპიკერი, იოანე გორელიშვილი მივიდა, რომელსაც დეკანოზის ოჯახის წევრები დაუპირისპირდნენ.

„შევიკრიბეთ, რადგან ეპარქიის მმართველს, მეუფე დიმიტრის შევახსენეთ, რომ სასულიერო პირი უდანაშაულოდ ზის ციხეში და არანაირი რეაგირება არ ხდება ეპარქიის მხრიდან, ელემენტარული მოკითხვაც არ ხდება. მეუფე დიმიტრიმ ყველაზე კარგად იცის, რის გამოც ზის გიორგი მამალაძე ციხეში და იცის, რომ ის არის უდანაშაულო. თუ ამას რეაგირება არ მოჰყვება, ჩვენ ფართომასშტაბიან აქციებს ვგეგმავთ. აქამდე გიორგი ბათუმის ეპარქიას შანსს აძლევდა, რომ ელემენტარული ნაბიჯი გადაიდგმებოდა უდანაშაულო დეკანოზის დაცვისთვის,“ – თქვა თორნიკე მამალაძემ, დეკანოზის ძმამ.

„მეუფეო, შეწყვიტეთ დუმილი და თქვით სიმართლე,“ – ეს ერთ-ერთი ტრანსფარანტია, რომელიც დღეს აქციის მონაწილეებმა  რეზიდენციასთან მიიტანეს. მიტროპოლიტი დიმიტრი აქციის მონაწილეებთან არ მისულა, თუმცა აქციაზე ეპარქიის პრესსპიკერი – იოანე გორელიშვილი გამოჩნდა. მან თქვა, რომ მიტროპოლიტი სამკურნალოდ გერმანიაში იმყოფება.

„რის შესახებ უნდა ისაუბროს მიტროპოლიტმა დიმიტრიმ და რა შეიძლება გააკეთოს ეპარქიამ დეკანოზისთვის?“ – თორნიკე მამალაძემ „ბათუმელების“ შეკითხვას მოკლედ უპასუხა: „ეს მეუფემ უკეთ იცის და ის გიპასუხებთ…“

დეკანოზის ძმა ასევე ფიქრობს, რომ ბათუმისა და ლაზეთის ეპარქია უპასუხოდ არ უნდა ტოვებდეს სხვა ეპარქიის მღვდელმთავრების საჯარო განცხადებებს დეკანოზ გიორგი მამალაძის შესახებ.

„მაგალითად, როცა მეუფე იაკობი ილანძღება და ის არ ერიდება არც დეკანოზის ლანძღვას, ელემენტარულად ამის საწინააღმდეგოდაც არაფერი კეთდება,“ – ამბობს თორნიკე მამალაძე.

„მეუფე დიმიტრის დუმილი დასარღვევი არ აქვს, მან რაც იცოდა, თქვა. თუ რამე მოსაყოლი აქვს გიორგი მამალაძეს, თქვას,“ – უთხრა ჟურნალისტებს ბათუმისა და ლაზეთის ეპარქიის პრესსპიკერმა, იოანე გორელიშვილმა.

პრესსპიკერს ჟურნალისტებმა ჰკითხეს, რას ფიქრობს მეუფე დიმიტრი გიორგი მამალაძის სასჯელთან დაკავშირებით.

„მეუფე დიმიტრი დარწმუნებული რომ იყოს მის სრულ უდანაშაულობაში, ის ასე უქმად არ იქნებოდა და აუცილებლად რაღაც ნაბიჯებს გადადგამდა. გაურკვევლობა არსებობს, არსებობს კითხვები…“ – აღნიშნა იოანე გორელიშვილმა.

ბათუმისა და ლაზეთის ეპარქიის პრესსპიკერის თქმით, მეუფე დიმიტრი, არსებული კითხვების მიუხედავად, უშუალოდ დაუკავშირდა პრეზიდენტის ადმინისტრაციას და გიორგი მამალაძის შეწყალება ითხოვა.

„მეუფემ მხარი დაუჭირა შეწყალებას… ის, რომ მეუფე არაფერს აკეთებს, ეს ტყუილია. სამწუხაროდ, ეს საკითხი არ განიხილა კომისიამ დადებითად. პრეზიდენტის აპარატთან რომ შეკრებილიყვნენ, გასაგები იქნებოდა,“ – თქვა პრესსპიკერმა.

გიორგი მამალაძის ახლობლებმა მეუფის რეზიდენციასთან საპროტესტო აქცია გამართეს

„თქვენ მატყუარა ხართ,“ – მიმართა ეპარქიის პრესსპიკერს გიორგი მამალაძის ძმამ. ბათუმის და ლაზეთის ეპარქიის რეზიდენციასთან საპროტესტო აქციაზე შეკრებილებმა „ციანიდის საქმეზე“ მიტროპოლიტისგან დუმილის დარღვევა მოითხოვეს.ვრცლად: https://batumelebi.netgazeti.ge/news/160746/

Posted by ბათუმელები • Batumelebi.ge on კვირა, 30 სექტემბერი, 2018

იოანე გორელიშვილის თქმით, მიტროპოლიტ დიმიტრისაც აინტერსებს „ციანიდის საქმის“ დეტალები: „ცალკეული მღვდელმთავრებიც ამბობენ, რომ რაღაც ახალი გაიგეს. თუ რამე იციან, თქვან. ჩვენ ვთვლით, რომ საზოგადოება ღირსია, იცოდეს სიმართლე“.

ჟურნალისტებისთვის კომენტარის მიცემის შემდეგ პრესსპიკერს გიორგი მამალაძის ოჯახის წევრები დაუპირისპირდნენ. დეკანოზის ძმამ მას სთხოვა აეხსნა, რატომ მიმართა მიტროპოლიტმა ჟურნალისტებს, როცა იგი ციხეში დეკანოზის მოსანახულებლად შევიდა.

„ეს პიარისთვის გააკეთეთ. მაგის შემდეგ არც გიორგი მოუნახულებია მეუფეს და არც მისი ცოლ-შვილი მოგიკითხავთ. რას ამბობს სახარება პატიმრებზე გახსოვთ?“ – მიმართა მამა იოანეს თორნიკე მამალაძემ.

„ჩვენ ჟურნალისტებისთვის მაშინ არ დაგვირეკავს. მათ თავად გაიგეს ის, რომ მეუფე ციხეში შესვლას აპირებდა,“ – აღნიშნა ეპარქიის პრესსპიკერმა.

„რატომ აღარ შეიქმნა სინოდის მიერ დაანონსებული კომისია, რომელიც გიორგი მამალაძის საქმეზე იმუშავებდა?“ – იოანე გორელიშვილმა „ბათუმელებს“ უთხრა, რომ კომისიის შექმნის საკითხი ისევ განიხილება.

„ჩვენ გვინდოდა, რომ შეეწყალებინათ გიორგი მამალაძე. ასეთ შემთხვევაში, ის თავად მოვიდოდა და მოუყვებოდა ყველაფერს საქმის შესახებ კომისიას…“ – თქვა მან.

„ჩვენ პირდაპირ მეუფეს შევხვდებით ჟურნალისტების თვალწინ… წადით, რატომ არ მიდიხართ? შედით თქვენს რეზიდენციაში – უთხრეს კამათის შემდეგ ეპარქიის პრესსპიკერს გიორგი მამალაძის ოჯახის წევრებმა.

იოანე გორელიშვილი რეზიდენციაში მას შემდეგ შებრუნდა, როცა აქციის მონაწილეები დაიშალნენ.

დეკანოზ მამალაძეს თბილისის საქალაქო სასამართლომ 9-წლიანი პატიმრობა 2017 წლის 5 სექტემბერს მიუსაჯა. სასამართლომ დეკანოზი პატრიარქ ილია მეორის მდივან–რეფერენტის, შორენა თეთრუაშვილის მკვლელობის მომზადებაში ცნო დამნაშავედ.

27 სექტემბერს ცნობილი გახდა, რომ პრეზიდენტმა გიორგი მარგველაშვილმა დეკანოზი გიორგი მამალაძე არ შეიწყალა.

აქცია ბათუმისა და ლაზეთის ეპარქიის რეზიდენციასთან / 30.09.2018 /

 

 

 

გადაბეჭდვის წესი


ასევე: