ქედის საბიბლიოთეკო განყოფილების ორგანიზებით, პოეტ ანზორ ლორთქიფანიძის იუბილესთან დაკავშირებით, პოეზიის საღამო გაიმართა.
პოეტს საიუბილეო თარიღი მიულოცეს და მისი შემოქმედება მიმოიხილეს ადგილობრივმა პოეტებმა, საზოგადოების წევრებმა, თვითმმართველობის მოხელეებმა და ნორჩმა დეკლამატორებმა.
ქედის მერმა, ლევან გორგილაძემ, პოეტს ჰონორარის სახით ფულადი საჩუქარი გადასცა.
„მინდა ბატონ ანზორ ლორთქიფანიძეს საჯაროდ მივულოცო დაბადების დღე და ვუსურვო ხანგრძლივი სიცოცხლე და ახალი შემოქმედებითი გამარჯვებები! მის მეტად საინტერესო, უაღრესად ინდივიდუალური ხელწერით გამორჩეულ ლექსებს, ლამის ბავშვობიდანვე ვკითხულობთ და აზრის სიღრმესა და ფილოსოფიურობასთან ერთად, ყოველთვის გვხიბლავს ძალუმი მხატვრული სიტყვის სურნელი და სისადავე, კოლორიტულ სახეთა სიმრავლე, შემოქმედის ამოუწურავი ტალანტი.
ჩვენ შევეცადეთ მცირედი საჩუქრით გამოგვეხატა ყურადღება ყველასათვის საყვარელი პოეტის საიუბილეო დღის აღსანიშნავად და ქედის მერია ჰონორარის სახით იუბილარს 500 (ხუთას) ლარს გადასცემს,”- ასე მიესალმა ლევან გორგილაძე პოეტ ანზორ ლორთქიფანიძეს.
პოეტს იუბილე მიულოცეს ასევე საქართველოს პარლამენტის მაჟორიტარმა დეპუტატმა ანზორ ბოლქვაძემ და შუახევის მუნიციპალიტეტის მერმა ფრიდონ ფუტკარაძემ.
პოეტ ანზორ ლორთქიფანიძის იუბილე
ღონისძიებას მუსიკალურად კვარტეტი ,,ელესა” აფორმებდა.
ანზორ ლორთქიფანიძე 1941 წლის 10 ივლისს ქედის რაიონის სოფელ ვაიოში დაიბადა.
1966 წელს ჩაირიცხა თბილისის ივ. ჯავახიშვილის სახელობის უნივერსიტეტში.
სხვადასხვა დროს მუშაობდა აჭარის მთიანეთში პედაგოგად და მოზარდ თაობას დიდი სიყვარულით ასწავლიდა მშობლიურ ენას.
მოღვაწეობდა ქედის რაიონული გაზეთის კორესპონდენტად, ბათუმის სოციალურ – პოლიტიკურ ინსტიტუტში მართლწერის მასწავლებლად.
პოეტ ანზორ ლორთქიფანიძის იუბილე
ანზორ ლორთქიფანიძე ოთხ ათეულ წელზე მეტია პედაგოგიურ მოღვაწეობასთან ერთად ეწევა შემოქმედებით საქმიანობას. ნიჭიერი პოეტის დაინტერესების სფეროა როგორც ქართულის, ასევე აჭარის ეტიმოლოგიური, ლიტერატურული თუ მართლწერის მეცნიერული საკითხები. მისი პირველი ლექსი დაიბეჭდა 1966 წელს, შემდეგ მრავალი ლექსი, სამეცნიერო ნაშრომი სისტემატიურად იბეჭდება ჟურნალ-გაზეთებში.
მკითხველი დღემდე მის შემოქმედებას იცნობს, როგორც ჟურნალ-გაზეთებით, ასევე ორი პატარა კრებულით: „დედასავით ერთადერთო“ და „ლექსები“. უდიდესი წვლილი მიუძღვის პოეტს ქართული ლიტერატურის განვითარების საქმეში. ასევე თავისი ლექსებით მან აჭარული დიალექტი გამოიტანა სამოღვაწეო ასპარეზზე.
