როგორი ფერის ავტობუსი უნდა მოძრაობდეს ბათუმში – მერია მოსახლეობის გამოკითხვას აპირებს

ბათუმის მერის ინფორმაციით, აგვისტოს შუა რიცხვებიდან ქალაქში 15 ერთეული ახალი ავტობუსი შემოვა. წლის ბოლომდე კი ქალაქში 40 ახალი ავტობუსი იმოძრავებს.

ავტობუსები, როგორც მერიაში აცხადებენ, ევრო 5 დიზელის, GPS და კონდიცირების სისტემით აღჭურვილი, ადაპტირებული და ნაწილობრივ დაბალძირიანი იქნება.

როგორი ფერის უნდა იყოს ქალაქში მოძრავი მუნიციპალური ავტობუსი –  ლურჯი, წითელი თუ ყვითელი, ამასთან დაკავშირებით, როგორც მერიაში „ბათუმელებს“ უთხრეს, მერია მოსახლეობის გამოკითხვას მომავალი კვირიდან აპირებს.

ახალი ავტობუსების მოწოდებაზე ხელშეკრულებას 16 მაისს მოეწერა ხელი, ,,ბათუმის ავტოტრანსპორტსა“ და ტენდერში გამარჯვებულ კომპანია „ჩერკასს“ შორის. როგორც „ბათუმის ავტოტრანსპორტში“ ამბობენ, ავტობუსები იაპონურ-უკრაინული წარმოების „ისუზუ ატამანის“ მოდელის იქნება.

ავტობუსების შესყიდვა საერთაშორისო ტენდერის ფარგლებში ხორციელდება და ევროპის განვითარებისა და რეკონსტრუქციის ბანკის დაბალპროცენტიანი სესხით (EBRD) ფინანსდება.

როგორი ფერის ავტობუსი უნდა დადიოდეს ქალაქში? – მერია მოსახლეობის გამოკითხვას აპირებს.