15 ლარი – ბათუმის საბაგიროთი მგზავრობის ფასი


ბათუმის საბაგიროთი მგზავრობის ფასი წელსაც 15 ლარი იქნება. როგორც კომპანიაში გვითხრეს, ახლო გაზაფხულზე თუ ტურისტულ სეზონზე ვიზიტორებს ამ ფასად მოემსახურებიან.

საბაგირო გზით სარგებლობა ერთი ადამიანისთვის 15 ლარია, ხუთ წლამდე ბავშვებისთვის – უფასო, ხუთი-თორმეტი წლის ბავშვებისთვის კი – 5 ლარი. კომპანიაში მიაჩნიათ, რომ საბაგიროს ღირებულება ევროპულ ფასებს შეესაბამება.

კომპანიის ინფორმაციით, საბაგიროთი სკოლის მოსწავლეებიც 5 ლარად ისარგებლებენ – ოღონდ სკოლის დირექციამ მათ წერილობით უნდა მიმართოს.

უფასო იქნება საბაგირო აჭარის მაღალმთიან რეგიონში მცხოვრები ბავშვებისთვის. ამ შემთხვევაშიც კომპანიას სკოლის დირექციამ უნდა მიმართოს.

როგორც კომპანიაში „ბათუმელებს“ უთხრეს, ჯერჯერობით ამ შეღავათების მისაღებად მათთვის არც ერთ სკოლას არ მიუმართავს.

კომპანია ფასდაკლების მიღების კიდევ ერთ გზას სთავაზობს მგზავრებს – უფასოდ იმგზავრებთ, თუკი ბათუმგორაზე არსებულ  რესტორან „არგოს“ 25-ლარიან ვაუჩერს შეიძენთ.

კომპანიაში ამბობენ, რომ უცხოელი ვიზიტორების რაოდენობა ყოველწლიურად იზრდება. მათი ინფორმაციით, მარტში გაიზარდა ვიზიტორების რაოდენობა თურქეთიდან და ისრაელიდან, თუმცა კომპანიაში არ სურთ ზუსტი სტატისტიკის გასაჯაროება – რამდენმა ადამიანმა ისარგებლა ამ პერიოდში მათი მომსახურებით.

აჭარის ტურიზმის დეპარტამენტის მონაცემებით, რომელიც ვიზიტორთა რაოდენობას ძირითადად ტურისტული სეზონის მიხედვით ითვლის, ბათუმის საბაგიროთი სარგებლობა, გასულ წელს, 19 პროცენტით გაიზარდა წინა წელთან შედარებით. 2017 წლის ივნის-აგვისტოს მონაცემებით, საბაგიროთი 190 343-მა ვიზიტორმა ისარგებლა, ხოლო ბოლო რვა თვის მონაცემებით – 214 602-მა ვიზიტორმა.

2600 მეტრი სიგრძის საბაგირო „არგოს“ სამშენებლო კომპანია „ჰესტოკ ბათუმი“ ფლობს. საბაგირო გზა 2013 წელს გაიხსნა. თავდაპირველად მგზავრობის ფასი 3 ლარი იყო.

სასტუმრო და რესტორანი ბათუმის გორაზე.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com