სიახლეები

უმაღლესი საბჭოს თავმჯდომარე კოლეგის კომპანიისა და მოქალაქეების დაპირისპირებაზე

15.03.2018 • 1865
უმაღლესი საბჭოს თავმჯდომარე კოლეგის კომპანიისა და მოქალაქეების დაპირისპირებაზე

როგორ შეაფასეს კოლეგის კომპანიის საქმიანობა უმაღლეს საბჭოში მას შემდეგ, რაც ხვიჩა შარაშიძის საკუთრებაში არსებული შპს „ჩემი სახლის“ მიერ წამოწყებულ სამშენებლო პროცესზე ტელევიზიებმაც მოამზადეს სიუჟეტები და ამ თემას „ფეისბუქშიც“ დიდი განხილვა მოჰყვა.

ახალი მშენებლობის გამო დეპუტატის კომპანიამ მომიჯნავედ, სამსართულიან სახლში მცხოვრებ სამ ოჯახს ფანჯრები გააუქმა. კომპანიამ მათ სახლზე ნაწილობრივ მოჭრა სახანძრო კიბე და კედლიდან ჩამოხსნა ერთ-ერთი ოჯახის კონდიციონერი.

უქმნის თუ არა ეს უმაღლესი საბჭოს დეპუტატებს უხერხულობას, დაინტერესდნენ თუ არა ისინი ამ საკითხით და დაუსვეს თუ არა კოლეგას კითხვები – ამ თემაზე „ბათუმელებს“ უმაღლესი საბჭოს თავმჯდომარემ, დავით გაბაიძემ უპასუხა.

ბატონო დავით, თქვენი კოლეგის სამშენებლო კომპანიის საქმიანობაზე გაიგებდით ალბათ. ამომრჩეველი ამბობს, რომ დეპუტატი მათ უფლებებს არღვევს.

თუ ეს სტატუსთან შეუთავსებელი საქმიანობაა, ეს უნდა გადაწყვიტოს იურიდიულმა კომისიამ. ეს კომისია, ბუნებრივია, ჩემთან ერთად გაეცნო საკითხს და საბოლოო ჯამში ის გადაწყვეტს.

ჩვენ ვიცით, რომ დეპუტატს ეს საკითხი იურიდიულად მოგვარებული აქვს – კომპანია მართვაში აქვს გადაბარებული თავისი ოჯახის წევრებისთვის. ჩვენ გვაინტერესებს, დეპუტატის კომპანია ხომ არ არღვევს ამომრჩევლის უფლებებს?

არც ერთი მოქალაქის უფლება რომ არ უნდა ირღვეოდეს, ამაზე შევთანხმდეთ. არ აქვს მნიშვნელობა ეს დეპუტატის მხრიდან ხდება თუ რიგითი მოქალაქის. ირღვევა თუ არა მოქალაქის უფლება, ამის დამდგენი სუბიექტი მე არ ვარ. თუ ირღვევა, ამას აქვს შესაბამისი პროცედურები, ამ ქვეყანაში არსებობს სასამართლო, უნდა გასაჩივრდეს ნებართვის კანონიერება, ან მიმდინარე მშენებლობა ჯდება თუ არა ნებართვის ფარგლებში. აქედან გამომდინარე მე ვერ გეტყვით, რომ ეს საკითხი ჩვენ ისე შევისწავლეთ, რომ შემიძლია შევაფასო ჯერ მშენებლობის ნებართვის კანონიერება და შემდეგ ამ მშენებლობის შესაბამისობა ნებართვასთან.

ამან უხერხულობა თუ შეუქმნა უმაღლესი საბჭოს – დაუსვით თუ არა კითხვები კოლეგას?

თქვენ როგორ ფიქრობთ? – ადამიანები თუ ფიქრობენ, რომ უმაღლესი საბჭოს წევრი ამომრჩევლის უფლებებს არღვევს, ეს არ შეგვიქმნის უხერხულობას? – მაგრამ ამ უხერხულობის დასაბუთების ან გაქარწყლების საშუალება, იმის დამტკიცება ნამდვილად ირღვევა თუ არა კანონი – ეს არ მაქვს შესწავლილი. უხერხულობას ხელისუფლებაში მყოფი პირისათვის გამოიწვევს ასეთი ქმედება ნებისმიერი თანამდებობის პირისგან, მით უმეტეს თუ ეს არის დეპუტატი. თუკი კანონს აცდენილ ქმედებასთან გვაქვს საქმე, მაქვს მე ახლა ამის საფუძველი ან თქვენ – თქვენ ცოტა უფრო შეიძლება გაბედული იყოთ ამ ნაბიჯში, მაგრამ მე გამომდინარე იქედან, რომ საჯარო თანამდებობის პირი ვარ და ჩემს სიტყვას უფრო მეტი დაფიქრება სჭირდება, გეუბნებით, რომ მე არ მაქვს ამ წუთას საფუძველი ვთქვა, რომ აუცილებლად ირღვევა იქ ვინმეს უფლებები.

თუკი ვინმეს უფლება ირღვევა, ამას უნდა მოჰყვეს სამართლებრივი რეაგირება და თუკი სამართლებრივი რეაგირების შემდეგ დადგინდება, რომ ნამდვილად არის დარღვევა ვინმეს მხრიდან, ბუნებრივია, ეს არის შესაბამისი პოლიტიკური პასუხისმგებლობის საკითხი.

მოშენებულ ფანჯრებს რომ თავი დავანებოთ, მაშინ, როცა ამ ქალაქში ახალ მშენებლობებთან მიმართებაში უსაფრთხოების პრობლემებზე არგუმენტირებულად საუბრობენ, დეპუტატის კომპანიამ ძველ სახლზე სახანძრო კიბე გააუქმა. ამას როგორ აფასებთ?

ამისათვის არსებობს მერია და ზედამხედველობის სამსახური, რა უნდა გავაკეთო, ყველა მშენებლობას მე ხომ ვერ ჩამოვივლი. ამაში იღებენ ხელფასს მერიის სანებართვო სამსახურები, ისევე, როგორც მე საკანონმდებლო საქმიანობაში. მათ უნდა ჰკითხოთ სახანძრო კიბის მოხსნა ამ შემთხვევაში ხომ არ არღვევს უსაფრთხოების წესებს.

რ გეკითხებით სამშენებლო წესების დარღვევაზე. მე იმაზე გეკითხებით, დეპუტატის მოვალეობა არის თუ არა ამომრჩევლის უფლებების დაცვა?

მე არ ვამბობ, რატომ მისვამთ ამ კითხვებს-მეთქი. ვცდილობ ჩემი, როგორც იურისტის შესაძლებლობიდან გამომდინარე სწორ მისამართზე გაგიყვანოთ. თუ კითხვა ჩნდება: ირღვევა თუ არა ადამიანების უფლებები, უფლებათა დაცვის კომისია გვაქვს და ამ შემთხვევაში სწორი მიმართულება იქნება, თუ ამ კომისიის წინაშეც დაისმება ეს საკითხი. საბოლოოდ ეს უნდა გავიდეს იმ ხაზზე, მშენებლობის ნებართვა სწორადაა თუ არა გაცემული და ნებართვის საფუძველზე სწორად მიმდინარეობს თუ არა მშენებლობა.

ის, რომ დეპუტატის სახელი ტრიალებს მართებულად თუ არამართებულად უარყოფით კონტექსტში, ეს უხერხულობას, რასაკვირველია, შექმნის. ეს არის კითხვა იმაზე ორჯერ ორი ოთხია თუ არა, ოთხია, კი ბატონო.

დეპუტატი ხვიჩა შარაშიძე აჭარის უმაღლეს საბჭოში ქედის, შუახევისა და ხულოს მაჟორიტარია „ქართული ოცნებიდან“. ის პოლიტიკაში ბიზნესიდან მივიდა – 2006-2016 წლებში  სამშენებლო კომპანიების მფლობელი იყო.

ამავე თემაზე:

დეპუტატის კომპანიამ მეზობელ სახლზე სახანძრო კიბე მოჭრა და ფანჯრები გააუქმა

გადაბეჭდვის წესი