„საღამოს 9 საათი იქნებოდა, როცა ლეპტოპი ძალით წაართვეს კაცს ქუჩაში,“ – ამბობს ადვოკატი ვაჟა მელაძე საქმეზე, სადაც სამი ახალგაზრდაა ბრალდებული. საქმეს ბათუმის საქალაქო სასამართლოში მოსამართლე ლევან გელოვანი განიხილავს.
გამოძიებამ სამივე ბრალდებული ვიდეოსათვალთვალო კამერების ჩანაწერების საშუალებით დააკავა. ბრალდებულებმა ირაკლი თ.-მ ირაკლი გ.-მ და იური ჯ. -მ წარდგენილი ბრალი დაკავებისთანავე აღიარეს. თქვეს, რომ ნასვამები იყვნენ და დაკავების შემდეგ ლეპტოპი მესაკუთრეს დაუბრუნეს.
ორი ბრალდებული სასამართლომ გირაოს საფუძველზე გაათავისუფლა, ერთს კი, რომელიც მანამდე სხვა დანაშაულის ჩადენისთვის პირობითი მსჯავრის ქვეშ იმყოფებოდა, აღკვეთი ღონისძიების სახით, წინასწარ პატიმრობა შეუფარდეს.
„უნდა გათავისუფლდეს ირაკლი გ. პატიმრობიდან,“ – მიმართა მოსამართლეს ადვოკატმა ვაჟა მელაძემ. მისი არგუმენტი დღევანდელ სასამართლო პროცესზე იყო ის, რომ ბრალდებული ერთადერთი მარჩენალია ოჯახში და მას ასევე ჯანმრთელობის მძიმე მდგომარეობა აქვს. დაცვის მხარემ სასამართლოს ირაკლი გ.-ს გათავისუფლება 8-ათასლარიანი გირაოს სანაცვლოდ შესთავაზა.
„ეს არსებითად ახალი გარემოება არ არის“, – აღნიშნა მოსამართლემ და შუამდგომლობის დაკმაყოფილებაზე უარი თქვა.
საქმის განხილვა პროკურორის არყოფნის გამო გადაიდო. პროკურორმა ზურაბ კონცელიძემ სასამართლოს წერილობით აცნობა, რომ სემინარზე იმყოფებოდა. პროცესის დასრულებამდე მოსამართლემ ასევე იკითხა, მიღწეულია თუ არა საპროცესო შეთანხმება პროკურატურასთან. ადვოკატმა თქვა, რომ შეთანხმება პრაქტიკულად უკვე არსებობს.
სასამართლო პროცესის შემდეგ, ადვოკატმა ვაჟა მელაძემ გვითხრა, რომ საპროცესო შეთანხმება დასაზუსტებელია ირაკლი გ.-ს შემთხვევაზე, რადგან იგი პირობითი მსჯავრის ქვეშ უკვე იმყოფება. ადვოკატი ამბობს, რომ ბრალდებულებს პირობით მსჯავრთან ერთად, რეალურ სასჯელსაც შეუფარდებენ.
ჯგუფურად ჩადენილი ძარცვა 5-დან 7-წლამდე თავისუფლების აღკვეთას ითვალისწინებს.
