რატომ არ კონტროლდება ცენტრალურ საავტომობილო გზებზე ინერტული მასალის მომპოვებელი კომპანიის მიერ მძიმე ტვირთის გადაადგილება და რა ბედი ელის მწყობრიდან გამოსულ ბათუმი-ახალციხის ცენტრალურ საავტომობილო გზის ქედის მონაკვეთს? – რამდენიმე დღის წინ, „ბათუმელების“ ამ კითხვაზე აჭარის მთავრობის თავმჯდომარემ განაცხადა, რომ ტვირთის გასაკონტროლებლად სასწორებს დააყენებენ, ხოლო დაზიანებული გზის შეკეთებას უახლოეს პერიოდში დაიწყებენ. ამ დრომდე გზის შეკეთება არ დაუწყიათ და არც სასწორები დაუყენებიათ.
აჭარის მთავრობის პრესსამსახურში სასწორის დაყენებასა და ტვირთის კონტროლთან დაკავშირებით აცხადებენ, რომ სხვადასხვა უწყებასთან კონსულტაციები მიმდინარეობს და დეტალები ამ დროისთვის დაზუსტებული არ არის. რაც შეეხება ცენტრალურ საავტომობილო გზას, ორმული შეკეთება წლის ბოლომდე დასრულდება.
ქედის მერიაში აცხადებენ, რომ მათი კომპეტენცია მხოლოდ ცენტრალური საავტომობილო გზის სავალი ნაწილის დაზიანება-დანაგვიანების გაკონტროლებაა და იმ შემთხვევაში, თუ ფიზიკური ან იურიდიული პირი ცენტრალურ საავტომობილო გზას დააზიანებს ან დაანაგვიანებს, დაჯარიმდება ადმინისტრაციულ სამართალდარღვევათა კოდექსის 119-ე მუხლის შესაბამისად. ჯარიმა 300 ლარია.
„რაც შეეხება გზაზე ტვირთის წონას, წონისა და ტევადობის კონტროლი ჩვენს კომპეტენციაში არ შედის. ცენტრალურ გზაზე გარემოს დანაგვიანებისთვის მიმდინარე წელს შვიდი მძღოლი დაჯარიმდა,“ – ამბობს სულიკო სურმანიძე, ქედის მერიის ზედამხედველობის სამსახურის უფროსი.
აჭარის ფინანსთა და ეკონომიკის სამინისტრომ 2017 წელს ერთწლიანი ლიცენზია აჭარაში ინერტული მასალის მოპოვებაზე 11 კომპანიას მისცა. ეს კომპანიებია: „ბიზონი“, „გოდერძი“, „დრო“, „ორბი ბეტონი“, „ანაგი“, „ვიქტორია“, „ლუგო“, „ბონდი-2009“, „კალტა“, “„ბათუმის საწარმოო კომბინატი“ და „ბმრ“. მთლიანობაში ნებართვა 525 446 კუბური მეტრი ინერტული მასალის მოპოვებაზეა გაცემული.
აჭარის ფინანსთა და ეკონომიკის სამინისტროს მიერ მოწოდებული ინფორმაციით, გასულ წელს 11 კომპანიაზე სხვადასხვა დროს ოცჯერ გაცემული ლიცენზიით, ქედაში ინერტული მასალის მოპოვების უფლება ამ დროისთვის თერთმეტივე კომპანიას აქვს.
11 კომპანიიდან გასულ წელს ყველაზე მეტი – 4 ლიცენზია მოიპოვა შპს „ორბი ბეტონმა“, შესაბამისად, ქედის მუნიციპალიტეტის ტერიტორიიდან ყველაზე მეტი მოცულობის ინერტული მასალის მოპოვების უფლება ამ კომპანიას აქვს მიღებული. სოფელ წონიარისსა და ზვარეში, მთლიანობაში, 99 782 კუბური მეტრი ინერტული მასალის მოპოვების უფლება „ორბი ბეტონს“ სამინისტრომ 2017 წელს აგვისტოსა და ოქტომბერში ერთი წლის ვადით მისცა. სოფელ წონიარისში ამ კომპანიასთან ერთად ინერტული მასალის მოპოვების ლიცენზია აქვს მიღებული შპს „ანაგს“, რომელსაც ამავდროულად ინერტული მასალის მოპოვების უფლება აქვს სოფელ ცხემნაშიც. ამ კომპანიას სამინისტრომ ლიცენზია გასულ წელს სამჯერ მისცა, მთლიანობაში, 86 782 კუბური მეტრი ინერტული მასალის მოპოვებაზე.
სამჯერ მიიღო ლიცენზია შპს დრომაც“, სულ 77 980 კუბური მეტრის ამოღებაზე. ორჯერ აქვტ ლიცენზია მიღებული შპს-ებს – „ბმრ“-სა და „კალთას“ . „ბმრ“-ს ნებართა სოფელ ზვარეში, „კალტას“ კი – სოფელ ცხემნაში.
ინერტულ მასალას კომპანიები ძირითადად მდინარე აჭარისწყლის სანაპიროდან იღებენ. მძიმე ტექნიკას მდინარის სანაპიროებიდან ამოღებული დაუწრეტავი სილა-ხრეში გადასამუშავებლად ქედიდან ხელვაჩაურში ისე გადააქვთ, რომ ტვირთის წონას ცენტრალურ საავტომობილო გზაზე არავინ აკონტროლებს. აჭარის საავტომობილო გზების დეპარტამენტის ინფორმაციით, მძიმე ტექნიკის მიერ დასაშვებ ნორმაზე მეტი ტვირთის მუდმივად გადაზიდვამ საავტომობილო გზა მწყობრიდან გამოიყვანა.
მთავარ ფოტოზე: ინერტული მასალის მოპოვება ქედაში, სოფელ ცხემნაში / ეკა ბარამიძის ფოტო
