ძლიერმა ქარმა ძირითადად ქობულეთის მუნიციპალიტეტი დააზარალა. ქობულეთის მუნიციპალიტეტის მერიის ინფორმაციით, დაზიანდა საცხოვრებელი სახლების, ასევე ქობულეთის მეორე საბავშვო ბაღის სახურავი, მოგლეჯილმა ხეებმა ჩახერგა გზები, დაზიანდა ელექტროგადამცემი ხაზები.
„წუხანდელი ქარიშხლის შედეგად მუნიციპალიტეტს ზიანი მიადგა. ამ დროისათვის მდგომარეობა სტაბილურია. ჩვენ მაქსიმალურად ვცდილობთ მერიაში შემოსულ შეტყობინებებზე დროული რეაგირება მოვახდინოთ. დაწყებულია საბავშვო ბაღის სახურავის აღდგენითი სამუშაოები, ასევე, ინტენსიურად იწმინდება მოგლეჯილი ხეებისგან ჩახერგილი გზები. მთელი ღამის განმავლობაში მობილიზებული იყო შესაბამისი სამსახურები და ვაწარმოებდით პატრულირებას, დაწყებულია ზარალის დათვლა,“ – აღნიშნულია ქობულეთის მერიის მიერ გავრცელებულ განცხადებაში.
ბათუმის მერიის ინფორმაციით, ცენტრალურ პარკში დაზიანდა და წაიქცა რამდენიმე ხე, რომლებიც გამწვანებისა და ლანდშაფტური დაგეგმარების სამსახურმა გაიტანეს.
„შპს ,,სანდასუფთავების“ მობილურმა ჯგუფებმა დანაგვიანებული ქუჩების დასუფთავება ქარის ჩადგომისთანავე განახორციელეს. დასუფთავდა ქალაქის ცენტრალური ნაწილი და გარეუბნები, გაწმენდითი სამუშაოები ჩატარდა ზღვის სანაპირო ზოლზე. ძლიერი ქარის შედეგად მშენებარე ობიექტიდან ჩამოცვენილმა სამშენებლო მასალებმა დააზიანა და ჩაანგრია ლუკა ასათიანის ქუჩაზე მდებარე სახლის სახურავი. აღნიშნულ მისამართზე უკვე დაიწყო აღდგენითი სამუშაოები,“ – აღნიშნულია ბათუმის მერიის მიერ გავრცელებულ ინფორმაციაში.
აჭარის მთავრობის პრესსამსახურის ინფორმაციით, ძლიერმა ქარმა ძირითადად ზღვისპირა მუნიციპალიტეტები დააზარალა. მთავრობის საგანგებო შტაბი ამ შემთხვევაში არ შეკრებილა.
საბავშვო ბაღის აღდგენითი სამუშაოები. ფოტო: ქობულეთის მერია
ბათუმი, ლუკა ასათიანის ქუჩა. ფოტო: ბათუმის მერია
ძლიერი ქარი ბათუმში. 04.03.2018 ფოტო: ბათუმის მერია
