ლიფტები და სახურავები ბათუმის მერიის თანადაფინანსებით

 

სამუშაოებისთვის ქალაქის ბიუჯეტიდან 80 ათასი ლარი დაიხარჯა.

ახალი ლიფტი უკვე დამონტაჟდა ჭავჭავაძის ქ. #78/88-ში. ლიფტის შეცვლის სამუშაოები ამჟამად გორგილაძის ქ# 82-ის III სადარბაზოში მიმდინარეობს. კიდევ 3 ახალი ლიფტი ვალენბერგის ქუჩაზე ექსპლუატაციაში 10 ოქტომბრამდე შევა. 

ლიფტების შეცვლის სამუშაოების ორგანიზებას „ბათუმის კორპუსი“ ახორციელებს. საბინაო ამხანაგობების ხელშეწყობის პროგრამის ფარგლებში, ღირებულების 10%-ს მოსახლეობა იხდის, დანარჩენი 90 პროცენტი კი მუნიციპალური ბიუჯეტიდან იფარება. 

პარალელურად მიმდინარეობს საცხოვრებელი კორპუსების სახურავების გამოცვლა. მერიის ინფორმაციით ამ დროისთვის გადახურულია 31 სახლი, 3 სახლზე კი სამუშაოები მიმდინარეობს. უახლოეს მომავალში კიდევ 6 კორპუსის სახურავის შეცვლაა დაგეგმილი.

ამჟამად სახურავის გამოცვლის სამუშაოები თამარის დასახლებაში, #10 სახლზე მიმდინარეობს, რისთვისაც ბიუჯეტიდან 60 ათასი ლარია გამოყოფილი. სახურავების გამოცვლის პარალელურად იცვლება წყალსაწრეტი მილები და წყალშემკრები ღარები.