Batumelebi | ახალი ბინა 12 ეკომიგრანტ ოჯახს აჭარაში ახალი ბინა 12 ეკომიგრანტ ოჯახს აჭარაში – Batumelebi
RU | GE  

ახალი ბინა 12 ეკომიგრანტ ოჯახს აჭარაში

 

2015 წლის 23 სექტემბერს აჭარის მთავრობის თავმჯდომარე არჩილ ხაბაძე, ჯანდაცვისა და სოციალური დაცვის მინისტრთან ნუგზარ სურმანიძესთან ერთად, ქედაში 12 ეკომიგრანტ ოჯახს ბინებს გადასცემს. 

აჭარის ჯანდაცვის სამინისტროს ინფორმაციით, შენობის რეაბილიტაციისათვის აჭარის ფინანსთა და ეკონომიკის სამინისტროს ბიუჯეტიდან 413 000 ლარი გამოიყო. ყოფილი პოლიკლინიკის არსებულ ორსართულინ შენობას მესამე სართული დაემატა, მოეწყო შენობის ფასადი და ინტერიერი. სამთავრობო კომისიის რეკომენდაციით და მთავრობის თავმჯდომარის გადაწყვეტილებით, ბინები გადაეცემათ ქედის მუნიციპალიტეტის სოფელ ჯალაბაშვილებში მცხოვრებ, სტიქიის შედეგად დაზარალებულ ეკომიგრანტ ოჯახებს. 


აჭარის ჯანდაცვის სამინისტროს ინფორმაციით, 2013 წლიდან დღემდე აჭარის ავტონომიური რესპუბლიკის ბიუჯეტის სარეზერვო ფონდიდან 1 101 ოჯახზე მატერიალური დახმარების სახით გამოიყო 2 132 934 ლარი საცხოვრებელი სახლების მშენებლობა/რეაბილიტაციის, მიწისძვრით დაზარალებული ოჯახების ქირით უზრუნველყოფის, ტრანპორტირების ხარჯისა და სტიქიით დაზიანებული მოსავლის კომპენსაციის მიზნით. 


2013-2015 წლებში საცხოვრებელი ფართობებით დაკმაყოფილდა ბუნებრივი და ტექნოგენური კატასტროფების შედეგად დაზარალებული 197 ოჯახი, აქედან: შუახევის ყოფილი საავადმყოფოს რეაბილიტირებულ შენობაში შესახლდა – 48 ოჯახი; ქედის ყოფილი საავადმყოფოს რეაბილიტირებულ შენობაში – 64 ოჯახი; თამარის დასახლებაში არსებულ სოციალურ სახლში- 85 ოჯახი.


ამავე პერიოდში, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს განსახლების პროგრამის ფარგლებში, აჭარის რეგიონიდან საცხოვრებელი ფართობებით დაკმაყოფილდა 27 ეკომიგრანტი ოჯახი. საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს, აჭარის ავტონომიური რესპუბლიკის მთავრობას, რეგიონალური განვითარებისა და სოციალური დახმარების ცენტრსა და შვეიცარიის განვითარებისა და თანამშრომლობის სააგენტოს შორის 2014 წლის თებერვალში გაფორმებული საგრანტო ხელშეკრულების ფარგლებში, აჭარის რეგიონიდან საცხოვრებელი ფართობებით დაკმაყოფილდა 21 ეკომიგრანტი ოჯახი.


სამინისტროს ინფორმაციით, აჭარის რეგიონიდან მიგრირებულ 571 ეკომიგრანტ ოჯახს უახლოეს მომავალში საკუთრებაში გადაეცემა საცხოვრებელი სახლები საქართველოს სხვადასხვა რეგიონში.


სოციალური სახლი ქედაში. ფოტო ბათუმელების არქივიდან
სოციალური სახლი ქედაში. ფოტო ბათუმელების არქივიდან

 

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"