Batumelebi | ნასტასია კინსკის მასტერკლასი ბათუმში ნასტასია კინსკის მასტერკლასი ბათუმში – Batumelebi
RU | GE  

ნასტასია კინსკის მასტერკლასი ბათუმში

 

ცნობილი მსახიობთან, ნასტასია კინსკისთან შეხვედრა დღეს, ბათუმში, სასტუმრო „დივანის“ საკონფერენციო დარბაზში დღის სამ საათზე უნდა დაწყებულიყო, თუმცა მსახიობმა დააგვიანა. შეხვედრაზე დასწრების მსურველების გარდა მსახიობს ჟუნალისტებიც ელოდნენ. ფესტივალის ორგანიზატორმა ზვიად ელიზიანმა  განმარტა, რომ ნასტასია კინსკი ფესტივალის საპატიო სტუმარია: „როცა საუბარია იმაზე, რომ ფესტივალს ყავდეს სტუმარად ვარსკვლავი, მას ვარსკვლავური დახვედრა სჭირდება, რისთვისაც ქალაქი მზად არ არის. “

რამ გაანაწყენა მსახიობი, ფესტივალის მენეჯერს არ დაუკონკრეტებია.

მოგვანებით სასტუმროში მოსული მსახიობი ვიდეოკამერებმა გააღიზიანა. ორგანიზატორებს არ ჰქონდათ პასუხი კითხვაზე, ჩატარდებოდა თუ არა დაანონსებული შეხვედრა, თუმცა შეხვედრა შედგა და ნასტასია კინსკიმ აუდიტორიის მიერ დასმულ ყველა კითხვას უპასუხა. 

 შეხვედრაზე მსახიობმა თქვა, რომ მისთვის ძალიან მნიშვნელოვანი იყო ბათუმის საავტორო კონოფესტივალის მიწვევა და ის ჯილდოც, რაც მან ამ ფესტივალისგან მიიღო:

„ახლა კი მე მჭირდება ბილეთი, რომ დავბრუნდე იქ, საიდანაც ჩამოვედი“ .

კითხვაზე, ჩავა თუ არა რუსეთში მსახიობმა უპასუხა: „მე მითხრეს, რომ როცა საქართველოში ხარ, შემდეგ რუსეთში არ უნდა ჩახვიდე … მაგრამ ვიცი, რომ ხელოვან ადამიანებს ძალიან უყვართ ერთმანეთი“

ცნობილ მსახიობს, ნასტასია კინსკს ბათუმში ყველაზე მეტად ქუჩის ხელოვნება, ანტიკური მედეას მონუმენტი, ქალაქის ფერები და დელფინები მოეწონა.

„ძალიან მომწონს ფერები თქვენს ქალაქში, განსაკუთრებით ღამით, ეს ოცნებას ჰგავს. მესამე დღეა რაც აქ ვარ და ძალიან კმაყოფილი ვარ, რომ ჩამოვედი. მაგრამ ახლა მე მჭირდება ბილეთი, რომ წავიდე იქ, საიდანაც ჩამოვედი“, – თქვა მსახიობმა შეხვედრის დაწყებისას.

ნასტასია კინსკი ბათუმის საავტორო კინოფესტივალს მოწვეული სტუმრის სტატუსით ესწრება, ბათუმის საავტორო კინოფესტივალი წელს მას ჯილდოს გადასცემს მსოფლიო კინემატოგრაფიაში შეტანილი წვლილისათვის. 

   

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე