Batumelebi | ცოლზე ძალადობაში ბრალდებული, შეწყვეტილი პროცესი და ექიმები სასამართლოში ცოლზე ძალადობაში ბრალდებული, შეწყვეტილი პროცესი და ექიმები სასამართლოში – Batumelebi
RU | GE  

ცოლზე ძალადობაში ბრალდებული, შეწყვეტილი პროცესი და ექიმები სასამართლოში

 

დღეს, 8 სექტემბერს, ბათუმის საქალაქო სასამართლოში დაახლოებით ნახევარი საათის განმავლობაში სასწრაფო დახმარების ექიმები ბრალდებულთან იმყოფებოდნენ. ბრალდებული შეუძლოდ სასამართლო პროცესის მიმდინარეობის დროს გახდა. 

 

 

მოსამართლემ სხდომა მას შემდეგ შეაჩერა, რაც ბრალდებული, რომელიც ცოლზე ძალადობის გამოა დაკავებული, შეუძლოდ გახდა. მას შემდეგ, რაც სასწრაფო სამედიცინო დახმარების ჯგუფმა ბრალდებულს დახმარება გაუწია, სხდომა განახლდა, თუმცა ბრალდებულმა მოსამართლეს უთხრა, რომ თავს ისევ შეუძლოდ გრძნობდა და სხდომის გადადება სთხოვა.


მოსამართლემ მისი შუამდგომლობა გაიზიარა. პროკურორმა კი აღნიშნა, რომ ბრალდებული შეუძლოდ მას შემდეგ გახდა, რაც სასამართლო პროცესზე მისმა შვილმა მამის წინააღმდეგ  ჩვენების მიცემის შესახებ განაცხადა.  „ასე შესაძლოა მომდევნო პროცესზეც გახდეს ის შეუძლოდ, ამიტომ იქნებ მის გარეშე გავაგრძელოთ საქმის განხილვა,“ – თქვა პროკურორმა. 


ადვოკატმა განაცხადა, რომ ეს საკითხი პროკურორის გადასაწყვეტი არ არის და ბრალდებულს სურს დაესწროს საქმის განხილვას.


სასამართლო სხდომა 24 სექტემბრისთვის გადაიდო.

 

ნეტგაზეთის მასალების სხვა გამოცემებში გადაბეჭდვის წესი
ნათია როყვა