Batumelebi | არჩილ ხაბაძე ჟურნალისტისა და სამინისტროს თანამშრომლების ინციდენტზე არჩილ ხაბაძე ჟურნალისტისა და სამინისტროს თანამშრომლების ინციდენტზე – Batumelebi
RU | GE  

არჩილ ხაბაძე ჟურნალისტისა და სამინისტროს თანამშრომლების ინციდენტზე

 

აჭარის მთავრობის თავმჯდომარე არჩილ ხაბაძე აჭარის ტელევიზიის ჟურნალისტსა და აჭარის სოფლის მეურნეობის სამინისტროს თანამშრომლებს შორის ინციდენტს გამოეხმაურა. არჩილ ხაბაძის თქმით, აჭარის სოფლის მეურნეობის მინისტრის მოადგილესა და აგროსერვისცენტრის ხელმძღვანელს დროებით უნდა შეუჩერდეთ უფლებამოსილება სიტუაციაში გარკვევამდე და თუ კი მათი მხრიდან დადასტურდება ჟურნალისტურ საქმიანობაში ხელშეშლა, მათ პასუხი უნდა აგონ კანონის წინაშე. 

 

 

არჩილ ხაბაძე
არჩილ ხაბაძე

„ჩემი აზრია კონკრეტული, რომ მანამდე უფლებამოსილება უნდა შეუჩერდეს ორივეს, მინისტრის მოადგილესაც და აგროსერვისცენტირს თანამშრომელსაც და სანამ არ იქნება გადაწყვეტილება სასამართლოს მიერ მიღებული, მანამდე უნდა შეუჩერდეთ.. თუ მსგავსი ქმედება დადასტურებულ იქნა, ვფიქრობ, რომ ეს მიუღებელია რა თქმა უნდა და უნდა აგონ პასუხი კანონის წინაშე“ – განაცხადა არჩილ ხაბაძემ აჭარის საზოგადოებრივ მაუწყებელთან.  


 

აჭარის ტელევიზიამ აღნიშნული ინციდენტის შესახებ ინფორმაცია პირველ სექტემბერს გაავრცელა. 

 

 

ტელევიზიის კორესპონდენტის ლაშა ველიაძის მუშაობის პროცესში ხელის შეშლის სავარაუდო ფაქტზე ტელევიზიამ აჭარის პროკურატურას წერილით უკვე მიმართა. ტელევიზიის  საინფორმაციო სამსახურის უფროსის, შორენა ღლონტის განმარტებით, 1-ელ სექტემბერს, დაახლოებით 18:00 საათზე, ქედაში, ღვინის ქარხანაში მისულ „ახალი ამბების“ ჯგუფს დახვდნენ აჭარის სოფლის მეურნეობის სამინისტროს თანამშრომლები. სწორედ მაშინ, როცა ჟურნალისტი უწყების ერთ-ერთ თანამშრომელთან ინტერვიუს ათანხმებდა, სიტყვიერი შეურაცხყოფა ფიზიკურ შეხლა-შემოხლაში გადაიზარდა. შემთხვევის ადგილზე ტელევიზიის გადამღები ჯგუფის ყოფნამ მირზა სუქნიშვილი გააღიზიანა. 

 

მირზა სუქნიშვილი კი რეპორტიორის ბრალდებას „სიცრუეს“ უწოდებს და აცხადებს, რომ რეპორტიორი ალკოჰოლის ზემოქმედების ქვეშ იყო. თავის მხრივ, აჭარის ტელევიზიაში ამბობენ, რომ იმავე დღეს სამხარეულის ექსპერტიზის ბიუროში რეპორტიორს ჩაუტარდა გამოკვლევა და იგი ალკოჰოლის ზემოქმედების ქვეშ არ ყოფილა. 

 

საქმის ობიექტურად შესწავლას ითხოვენ არასამთავრობო ორგანზიაციებიც. 


ნეტგაზეთის მასალების სხვა გამოცემებში გადაბეჭდვის წესი
"ბათუმელები"