ბრალდებულმა 16 წლის გოგო ბათუმში, 4 ივლისს დაჭრა.
როგორც მოსამართლე თამარ ბეჟანიშვილმა სასამართლო პროცესზე განმარტა, სკოლის მოსწავლეს ანუ დაზარალებულს, ბრალდებულმა შესთავაზა ცოლობა და მას შემდეგ, რაც გოგონამ უარი უთხრა, ბრალდებული მას მოკვლით ემუქრებოდა.
გამოძიების ვერსიით, მიმდინარე წლის ივლისში ბრალდებული იმყოფებოდა ბათუმში, 6 მაისის პარკში, სადაც გოგონას, რომელიც მას უყვარდა, შეხვედრა სთხოვა. გოგონა, რომელიც პარკში ძმასთან ერთად სეირნობდა, მამაკაცს შეხვდა, რომელმაც ცოლად გაყოლაზე უარის მიღების შემდეგ, გოგონას დანით ხუთი ჭრილობა მიაყენა. გოგონა ექიმების დახმარებით გადარჩა.
მამაკაცი ჯერ შემთხვევის ადგილიდან მიიმალა, მოგვიანებით კი პოლიციაში საკუთარი ფეხით მივიდა. როგორც მისმა ადვოკატმა, მამუკა ჭუმბურიძემ განაცხადა, ეს გადაწყვეტილება ბრალდებულმა სხვებთან კონსულტაციის გარეშე მიიღო.
მოსამართლემ იკითხა, მხარეებს ჰქონდათ თუ არა საუბარი საპროცესო გარიგებაზე. ადვოკატმა თქვა, რომ მცდელობა ჰქონდათ, თუმცა, ჯერჯერობით, შეთახმება არ არსებობს. დაცვის მხარე ბრალდების მიერ მოპოვებულ მტკიცებულებას არ ხდის სადავოდ.
პროკურორმა რამაზ შავაძემ თქვა, რომ საქმე ეხება ძალადობრივ დანაშაულს – თავისუფლებაში ყოფნის დროს ბრალდებული ზეწოლას ახორციელებდა დაზარალებულის მიმართ, რაც მისი თავისუფლებაში ყოფნის დროს შესაძლოა ისევ გაგრძელდეს. ამ არგუმენტებით მოსამართლის ინიციატივით დაყენებულ შუამდგომლობას, – აღკვეთი ღონისძიების გირაოთი შეცვლის თაობაზე, პროკურორი არ დაეთანხმა. დაცვის მხარე ბრალდებულის საპატიმროდან გათავისუფლებას გირაოს – 10 ათასი ლარის სანაცვლოდ ითხოვდა.
იმის გამო, რომ საქმეში რაიმე ახალი გარემოება არ არის, მოსამართლემ ბრალდებული ისევ პატიმრობაში დატოვა.
მკვლელობაში ბრალდებულ 20 წლის მამაკაცს 13-დან 17-წლამდე პატიმრობა ემუქრება, თუ სასამართლო გამამტყუნებელ განაჩენს გამოუტანს.
ბრალდებული სასამართლო პროცესზე მოსამართლის დასმულ კითხვებს მოკლედ პასუხობდა – „დიახ“ ან „არა“. ის, თითქმის მთელი პროცესის განმავლობაში, თვალებზე ხელებაფარებული იჯდა. ბრალდებული ადრე ნასამართლევი არ არის. დაზარალებული რამდენიმე წლის წინ გაიცნო, ისინი მეგობრობდნენ.
ბრალდებულმა უარი განაცხადა მისი სისხლის სამართლის საქმე განიხილონ ნაფიცმა მსაჯულებმა.
