განზრახ მკვლელობაში ბრალდებული 37 წლისაა. ისიც და გარდაცვლილიც ხულოს მუნიციპალიტეტის ერთ-ერთ სოფელში ცხოვრობდნენ და როგორც ბრალდებულმა სასამართლო პროცესზე თქვა, მეგობრობდნენ. ბრალდების მტკიცებით, ახალგაზრდა მამაკაცი ბრალდებულმა ეჭვიანობის ნიადაგზე მოკლა, მერე კი ცოლის დახმარებით, გვამი ჯერ ერთ ადგილას დამარხა, მოგვიანებით მოთხარა და მდინარის პირას, უკვე მეორედ დამარხა. როგორც ბრალდების დადგენილებაში წერია, ბრალდებულმა ცოლთან ერთად გაანადგურა მტკიცებულებები – მათ შემთხვევის სისხლიანი ადგილი წყლით გადარეცხეს.
პროკურორ ფრიდონ ქარცივაძესთან ერთად სასამართლოში პროკურატურის სახელით გამოდიოდა სტაჟიორი თამარ ზაქუტაშვილი. როგორც მან განაცხადა, თავისუფლებაში ყოფნის დროს ბრალდებული შესაძლოა მიიმალოს ან ზეგავლენა მოახდინოს მოწმეებზე, რომელთა უმრავლესობა ბრალდებულის თანასოფლელია, ამიტომაც მისი დაპატიმრება ითხოვა.
პროკურორ ფრიდონ ქარცივაძის აზრით, რომელიც მან მოსამართლეს გაუზიარა, “სახეზეა შემზარავი დანაშაული, არსებობს საზოგადოებრივი მაღალი ინტერესი ამ საქმისადმი, ამიტომ ბრალდებული უნდა იყოს მოქალაქეებისგან იზოლირებული”.
ბრალდებულის ინტერესების დამცველმა ადვოკატმა, ნოდარ მგელაძემ მოსამართლეს უთხრა, რომ მისი დაცვის ქვეშ მყოფი თანამშრომლობს გამოძიებასთან, ჰყავს სამი არასრულწოვანი შვილი, ოჯახის ერთადერთი მარჩენალია, ამიტომაც მისი პატიმრობიდან გათავისუფლება გირაოს – 10 ათასი ლარის სანაცვლოდ მოითხოვა. ადვოკატმა თქვა, რომ ამ ფულის გადახდას ოჯახის წევრები უძრავი ქონებით უზრუნველყოფდნენ.
ბრალდებულს მოსამართლემ განუმარტა, რომ თუ აქვს პრეტენზია, მაგალითად, დაკავების პროცედურაზე, თუ პოლიციელები არაადამიანურად მოეპყრნენ, შეუძლია მიმართოს პროკურატურას: “მე ვალდებული ვარ განგიმარტოთ ეს უფლება – თუ ფიქრობთ, რომ შეილახა თქვენი უფლებები, ღირსების შემლახავად ან არაადამიანურად მოგექცნენ, პროკურატურას უნდა მიმართოთ, სასამართლო ამაზე ძიებას ვერ დაიწყებს”.
ბრალდებულმა თქვა, რომ მას დაკავების დროს არაადამიანურად არავინ მოქცევია.
მკვლელობაში ბრალდებული მამაკაცი ადრე ნასამართლევი არ არის. სასამართლო პროცესზე მან მოსამართლეს უთხრა, რომ გარდაცვლილთან “მეგობრული”, “ძმური” ურთიერთობა ჰქონდა: “მაგრამ მან მისი ღირსება შელახა”.
სასამართლო პროცესს ესწრებოდნენ ბრალდებულის ნათესავებიც.
მიუხედავად იმისა, რომ საქმის მასალების მიხედვით, ბრალდებულს დანაშაულის კვალის დაფარვასა და გვამის გადამალვაში ცოლი ეხმარებოდა, ცოლს სისხლის სამართლებრივი პასუხისმგებლობა არ დაკისრებია.
ხულოს ერთ-ერთ სოფელში მდინარის პირას, ქვიშაში დამარხული 42 წლის მამაკაცის გვამი სამართალდამცავებმა 24 აგვისტოს იპოვეს.
