Batumelebi | საკრებულოს წევრი: მერიის თანამშრომლების საპრემიო თანხას რეკლამის ფესტივალში ხარჯავენ საკრებულოს წევრი: მერიის თანამშრომლების საპრემიო თანხას რეკლამის ფესტივალში ხარჯავენ – Batumelebi
RU | GE  

საკრებულოს წევრი: მერიის თანამშრომლების საპრემიო თანხას რეკლამის ფესტივალში ხარჯავენ

 

ბათუმის მერიის ბიუჯეტში დღეს ცვილიებები შედის – დაახლოებით 400 ათასი ლარი უახლეს კვირაში დაგეგმილი რეკლამის ფესტივალისთვის უნდა გამოიყოს. საკრებულოს წევრი კობა ჩხეიძე ამბობს, რომ ეს ბათუმის მერიის თანამშრომლების საპრემიო თანხაა. 

 

„როცა სახელფასო მუხლიდან დაახლოებით 400 ლარს იღებენ და ზუსტად იგივე ოდენობის თანხა ბიუჯეტში გაჩნდა რეკლამის საერთაშორისო ფესტივალზე, რა უნდა იფიქრო. ამბობენ, რომ თითქოს 300 კომპანია ჩამოდის და ეს ყველაფერი ტურიზმის განვითარებას შეუწყობს ხელს“, – ამბობს კობა ჩხარიძე.

 

საკრებულოს წევრის თქმით, მთელი წლის განმავლობაში მერიაში, რიგით თანამშრომლებზე მხოლოდ ერთი ხელფასის ოდენობის პრემიაა გაცეული – ერთხელ გაიცა ხელფასის 60%, მეორედ კი 40%-ით განისაზღვრა პრემიის ოდენობა.

 

კობა ჩხეიძის ინფორმაციით, ბათუმის მერიას წელს ზუსტად იმდენივე სახელფასო ბიუჯეტი ჰქონდა დამტკიცებული, რაც წინა წელში, მაგრამ წინა წლისგან განსხვავებით, წელს, 8 თვეში, საპრემიო თანხიდან 423 ათასი ლარი დაიზოგა. „ეს მერის ინიციატივით მოხდა“, – უთხრა „ბათუმელებს“ საკრებულოს წევრმა.

 

ასევე კობა ჩხეიძის ინფორმაციით, ბათუმის მერიაში ყოველთვიურად სახელფასო დანამატი მხოლოდ 24 მოხელეზე გაიცემა, მათ შორის არიან ვიცე-მერები, სამსახურების ხელმძღვანელები და ზოგიერთი სამსახურის ხელმძღვანელის მოადგილე.

 

კობა ჩხეიძის თქმით, როდესაც მერიაში იკითხა თუ რა პრინციპით ანაწილებდნენ დანამატს, მას უთხრეს, რომ ვინც კარგად მუშაობს ის იღებს დანამატს, „ანუ გამოდის, რომ მერიაში მხოლოდ 24 ადამიანი მუშაობს და დაახლოებით 500 ტყუილად არის?!“

 

რეკლამის საერთაშორისო ფესტივალ Ad Black Sea ბათუმში 2015 წლის 24-27 სექტემბერს ჩატარდება. ამ ფესტივალს წელს ეყოლება განსაკუთრებული სტუმარიც – ნინო ქათამაძე. იგი ფესტივალის მონაწილეების წინაშე საღამოს პროგრამის ფარგლებში 25 სექტემბერს წარსდგება. 

ნეტგაზეთის მასალების სხვა გამოცემებში გადაბეჭდვის წესი
ბათუმელები